Fa’amalosia Tulafono mo tangata asiasi mai

Mana (Auckland), Volume 1, Issue 10, 10 November 1977, Page 3

Fa’amalosia Tulafono mo tangata asiasi mai

“O i latou e fia ulufale mai i totonu o Niu Sila e fia fai galuega, e tatau i lea tagata ona ia fa’aalia sona pemita fa’ataga e faigaluega ai ’ae le’i ulufale mai i totonu o le atunu’u”. O se tasi-lea o vaega o le tulafono toe iloilo i mata’upu tau femalaga/iga ua fa’amoemoe le Malo, o le a fa’asalalauina ma fa’amalosia i le vaiaso nei. O le ali’i Minisita o Femalaga’iga, le susuga a Mr Gill, fai mai a ia, “I se taimi o lata mai. o le a ’ou tu’uina atu ai ile maota fono se tulafono e puipui ma fa’asaina ai tagata asiasi mai, ona faigaluega i totonu o Niu Sila, vagana ai_ua iai se fa’atagaga tusia i o latou pemita e ulufale mai ai i totonu o Niu Sila. Fai mai le ali’i Minisita, ‘O nei pemita o le a fa'atagaina atu mo na o i latou o le a talosaga mai, ua mautinoa e le ofisa o femalaga’iga a Niu Sila o lo’o i lea atunu’u, o sea tagata e poto masani ma e agava’a i galuega o lo'o galuea’ina i Niu Sila”. O tagata o lo’o i lalo i se puipuiga i se maliliega i le va o malo e lua, e pei o le fesuia’iga o tamaiti a’oga asiasi mai, o i latou ia o le a mafai pea ona fa’a faigaluegaina. O se tasi vaega o le tulafono, o le tu’uina atu lea oni aiaiga i Fale Faigaluega. I le vaega lea o le tulafono, ua fa’apea mai ai, “O le solitulafono le faigaluega, po’o le tauanau e fa’afaigaluega so’o se tagata asiasi mai i se pemita tafao, pe afai ua iai ni mafua’aga ua_ mautinoa ai e lea Kamupani, o sea tagata e le o fa’atagaina e faigaluega i Niu Sila. Fai mai fo’i le ali’i Minisita, o le mana’o o le malo sa i’ai i le tausaga na te’a nei ina ia fa’amauina ma resitala tagata ua silia o latou aso i totonu o Niu Sila ua te’ena_, talu ai le tete’e ma le le felagolagoma'i o nisi o Fale Faigaluega. Ma e o’o mai lava i le taimi nei, o lo’o fa’afaigaluegaina pea e nisi o Kamupani ia tagata ua silia o latou aso, ma ua nofo solitulafono i totonu o Niu Sila. Fai mai Mr Gill, “O se mea i le va o le 3,00 ma le 4,000 tagata o lo’o i totonu nei o Niu Sila ua silia o latou aso. Ua maitau atu i le tuputupu pea o le numela, o le mea lea ua tatau ona faia vave se isi fuafuaga ia vave taofia ai ’ae le’i o’o atu i se tulaga faigata. I se lipoti mai le ofisa o lo’o fa’amaumau ai tagata faimalaga, ua mautinoa ai e 3641 le aofa’i o tagata ua 'uma aso o o latou pemita e nonofo ai i Niu Sila I lea fuainumela e aofia ai tagata mai Samoa i Sisifo e 965, Tonga 942, United Kingdom 443, Fiti 269, ma Amerika e 260. Talu mai ai le masina o Mati 1977, tusa nei ma le 419 tagata ua silia aso ua tu’ua Niu Sila. E to’a 202 i latou na molia i le fa’amasinoga, mai ai i le 202 lea, e to’a 121 i latou ua tipoti.

I le taimi lava lenei i le tausaga na te’a nei, sa matua vevesi atoa ai le atunu’u ona o le mata’upu lava lenei i tagata ua silia Sa matua faitioina le malo ona o auala na latou fosia ma tau’aveina ai le tulafono, le fesiligia o so’o se tagata i luga o le ’auala i lona tusi folau.

O lejnei ua ta'utino mai e le malo, e le mana’omia pe fesiligia ni tusi folau po’o ni tusi fanau e fa’amaonia ai sau galuega, ao lea ua tu’uina atu i Kamupani ma Fale Faigaluega le malosi fa’aletulafono latou te te’ena ai so’o se tagata ua iai ni mafua’aga latou te

iloaina ai. o sea tagata e leai sona pemita faigaluega e galue ai i totonu o Niu Sila.

Mata ua ’uma nei le su'esu'eina e leoleo tagata i o latou tusi folaj.i ona ua fa’aeteete le malo ina ne'i toe tua’ina fo’i latou. a ua tu’u atu nei i Fale Faigaluega ma Kamupani latou te tau’aveina lea galuega? Mata e maua ’oe lena ua atoa lou lua tausaga 'ae na e sau i le pemita a 30 aso? E sili lava ona tatou uia le tulafono e maua ai le ta’ulelei, ’ae mataga le saisai o se isi ma ’ave fa’apagota na'o le ta’uvalea ma le masiasi e maua mai ai.