Akavaanga enua

Mana (Auckland), Volume 1, Issue 8, 13 October 1977, Page 4

Akavaanga enua

Te aue ua nei te au airi i te pa enua Kuki Airani i te ia au ra nei. Te manakoanga kia akakore ia te akavaanga enua i te pa enua Kuki Airani. E aa te tumuanga o te ia akakeuanga nei? Te vai nei te au manakonakoanga. Ko tetai ko ia oki kia kore ei te au pekapeka enua e akatikatika ia na roto i tetai mataara manea mei tei rave ia ana mai. Ka akapeea i reira te au enua tei riti ia kite tangata? Kare e pauanga manea i oronga ia mai. Ka rauka ra ia tatou i te tamanako atu. Mei tei akarongo ia te vai nei te aronga tangata te ka aue maata mei ta te au airi rai.

Kua akarongorongo ia e e pupu tangata tetai tei akono ia e te kavamani e pera katoa te akavaanga ngateitei ei tukuanga tika no tetai ua atu oroanga, me kore ra patianga no te riti enua i te Kuki Airani. Tei manako ia e tei ia

ratou taua tukuanga tika nei ko ia oki ko tetai o te au minita e tetai atu au tangata ta ratou ka iki mai ki runga i taua kumiti nei. Mei te mea rate ia akaraanga nei e, e akairo te ia no te patireia tere ki mua. Penei e tau kia akameitaki ia te au akaaere o te iti tangata Kuki Airani. Kia akameitaki ia te kavamani CIP no te ia angaanga manea, me e tika oki. Te pure nei ra oki te Mana e kare te ia e tika. Ka tiaki atu ra oki tatou ma te tapapa atu i te tuatau, kia tau ki ta te reo imene ra e “na te tuatau e apii mai ...”