[At top] 'Copy' Ahuahu 6 Hepetema 1852 E hoa, e Ta Kerei, Kua tae mai tau pukapuka. Tenei ano taku kupu ki a koe mo tena mea, mo te whenua. Kei a koe te whakaaro mo tou kainga, mo Mokau, kua whakaaetia nei e koe mo te Pakeha. He kupu kau atu taku ki a koe, kia puritia tetahi wahi o te whenua, ara, tenei ake ko a tatou tamariki kahore e kainga mo ratou. E pai ana tena na koutou, na nga kaumatua, na nga tamariki, ma koutou tahi i whakaae te whenua. Kei muri tata iho e kore koutou e mohio ki nga tikanga o te Pakeha mo te whenua. Koia ahau i hoatu ai i taku kupu kia rongo koutou. Na to hoa aroha, na Nuitone Te Pakaru E hoa, e Ta Kerei, Tena koe. Ka nui toku aroha atu ki a koe. E hoa, tenei ano taku kupu kia rongo mai koe mo te tikanga tuku whenua. Ko au te mea kua rongo i nga tikanga o tena hanga o te tuku whenua ki te Pakeha, no konei ahau i tuhituhi atu ai ki a koe kia puritia te whenua. Tenei ano te take i mea atu ai ahau ki a koe, i rongo ahau ki Akarana, ki te whare tuhituhi a Kawana. E korero mai ana nga Pakeha ki au, ka riro te whenua i nga Pakeha, ka taurekareka tatou nga Maori, kahore hoki he wahi o to tatou motu e noho nei, i mahue, kua riro katoa i te Pakeha. No konei au ka whakaaro ai kia puritia a kona, kaua e hoatu ki te Pakeha, otia he kupu kau taku, kei a koe ano te whakaaro. Heoi ano taku korero ki a koutou katoa. Na to matua aroha, na Nuitone Te Pakaru 'This letter was written by Te Pakaru's son.' Ahuahu 31 Akuhata 1852 E hoa, e Ta Kerei, Tenei taku korero ki a koe. Kua hoki a Nuitone ki tona kainga. Mei konei ia ka ki atu ahau ki a ia, me wawahi tenei pukapuka, he pukapuka he hoki. Tetahi he o tenei pukapuka he kapi puka, i wahia te kapipuka, te waiho nga kapipuka mo nga kuia. He maha hoki nga pepa nou hei tuhituhi reta - aua koutou e pena. Tetahi he o tenei pukapuka, ko nga korero. Kahore ahau i rongo ki tena korero e ki nei, 'Ka taurekarekatia nga Maori'. E hoa, e kore e pena nga korero o nga Pakeha o te Kawana. E kore e taurekarekatia te Maori, e nui ana te whenua mo koutou, mo nga Pakeha. Koia ahau ka mea atu nei ki a koutou katoa, tukua te whenua ki te Pakeha, kia riro mai ai he taonga mo koutou. E kore tena whenua takoto kau e whakatupu i te taonga mo koutou, engari tukua nuitia atu ki te Pakeha. Na to hoa aroha, na Te Whaitere