Ngamotu 21 Oketopa 1852 E hoa, e Makarini, Tena ra koe. Kia rongo mai koe, he kupu tenei naku ki a koe. Kua raruraru matou mo to tikanga ngaro ki a au, mo te wahi i whakatakotoria nei e koe nga utu ki a Karira, no te mea i tangohia pukutia i au. No muri i a koe ka pohehe taku whakaaro, no te mea ko aku tikanga kua pehia e Te Kupa ki raro, kua tahuri te whakaaro o Te Kupa ki nga tangata o Whatumataruru. Ko aku tikanga kua mate rawa i Whatumataruru i a Te Kupa hoki. Nau i whakahe ka taka au i runga i a taua tikanga. Ko tenei, ka mahue i au a taua tikanga, o tikanga i waiho ki a au, ka uru au ki roto ki te he. He kupu tenei naku kia rongo mai koe, ki te wahi i whakatakotoria nei e koe nga utu, ki a Karira. Ka pakeke au ki taua wahi mo nga ritenga he a Te Kupa ki a au. Ki te kore ona e rongo ki aku tukunga, me ka hoatu ki a ia, ka ki atu ra au ki a koe, e kore e pu. He mahara i te tamariki. Heoi ano, ka mutu. Naku, na tou hoa aroha, na Poharama Te Whiti