18 Hepetema 1852 Ki a Te Makarini kei Poneke He korero atu naku kia komiti atu ahau ki a korua ko Kawana, e Te Makarini, mo te mutunga iho ta matou ki a Kawana i Potekupa i tona taenga ake ki reira. Kaore he korero i toe i a Ngai Tahu, te korero i pau katoa mai i te tunga ai o taua komiti. Na Waikato a Te Rauparaha i amai, noho noa ake i Kapiti. Ka puremutia e Te Kekerengu nga wahine o Ngati Toa. Ka oma ake a Te Kekerengu ki to matou motu noho noa ake, kei Wairau. Ka rongo nga rangatira o Rangitae[?] ko Te Rauparaha tenei, ka kia mai kia tukituki te mahunga o Te Rauparaha ki te tukituki. Muri iho ka tukituki patu aruhe. Ka noho a Te Kekerengu ki Kaikoura. Ka rongo a Rerewaka, ka kia mai kia haea te puku o Te Rauparaha ki te niho mango. Ka kawea ake ana te niho mango. Muri iho ko Kaiapoi, ka mate ona tangata nunui ki Kaiapoi. Ka tikina ake a Tamaiharanui ma runga i te kaipuke, patua noatia ake i Waitohu. Muri iho ko maua ka mate katoa. Ko nga morehu i ora, 2 rau 9 tekau, nana ianei to matou i ora to matou whenua. Tena, titiro iho, e Kawana, ko te tikanga tenei o taua wahi o Kaikoura, o Kaiapoi hoki. Inaianei ko aua utu i hoatu ki a Rawari [Rawiri?]. Na, hei runga ano i Wairau takoto ai. Me homai ano e koe he utu mo Waipapa, mo Kaikoura, mo Aiauterurunui[?], Motunau, Rakahuri, Kaiapoi; kia kotahi mano pauna. Ka pai nga tangata o taua wahi, ko kotahi e kore e pai, engari kia kotahi mano, ko reira ra hari ai a Ngai Tahu mo te mea ka nui. Ka mau ratou i te utu o to ratou whenua. Na, titiro, e Te Makarini, ka utua e Wairaweke a Wairau ki nga hanga o te Kuini. Muri iho ko Wairaweke ka mate ki Wairau. No reira ano i tika ai ta Kawana tikanga, tena ko ta Rawiri tikanga e he ana. Ki toku whakaaro ake, patu he tango he i aua utu. Tena ko tau, e Kawana, tika tonu ki Wairau. Ko [o] utu ki mua, ko tupapaku ki muri iho. Ka pai tenei. Tena ko Ngati Toa patu he kai he i te kai tahu, tango he i nga utu o toku whenua. Na, whakarongo korua ki ena korero, kino ranei korua. Otira, e kore koe, e Kawana, e pai mai ki enei utu, ka waiho tonu e koe i runga i Kaiapoi? Ko nga utu o Kawia, o Waitohu hei utu mo nga utu o Kaiapoi. Kia mutu ai te tu o te komiti ki to aroaro, e Kawana, e rua mano pauna au i hoatu ai e koe ki a Rawiri. Me homai hoki e koe i nga utu o Kawia, o Waitohu hoki, kia rua hoki mano, no te mea hoki noku ano a Waitohu i aku tupuna ano i mua ai i ngaro i mua. Inaianei kua kitea e au, no reira ano i titia atu ai taku kupu ki Pukehou. Ka pai koe ki enei korero, ae, e kino koe, kei a Ngai Tahu ana a Kaiapoi. Otira, kei a koe ano mo enei utu, taku whakaaro me homai tonu e koe enei utu mo Waitohu. Heoi ano. Na maua ko Paora Tau, ko Hone Neteritahea[?] Ngai Tahu, no Kaiapoi maua