Hepetema 1853 17, no te rua tekau ma whitu o nga ra o Hepetema, ka tukua atu e maua te toenga o to maua kainga i hoatu e maua mo Kawana, hei mea hoatu noa ma maua, ara, mo ana tikanga pai kua takoto nei ki a maua, ara, koia tenei ko tana whakanuinga i a maua, ara, mo etahi tikanga aroha mai ona ki a maua. Koia ra ka rapu nei te ngakau, koia ano inahoki ka tika ano i to tatou matua[?], i te kaiwhakahaere tikanga o to tatou kainga, i a te Kawana, he tikanga pai mo tatou, ka ora tatou, ka noho tatou i runga i te rangimarire. No reira maua nei i rapu ai ki te toenga i toe nei, ara, koia tenei ko Moroa, ka tukua nei e maua mo runga i te aroha nui o to tatou Kawana, mo te homaitanga i te oranga ki a maua, mo te whakanuinga hoki i a maua, ara, koia tenei ko tana whakahokinga mai i tetahi wahi whenua mo mau[a?], ko te maha noa iho o nga tikanga pai e puta mai ana ki a maua. Koia tenei ka timata nei i tenei ra, ara, i nga tau o to tatou Ariki a Ihu Karaiti, te kaiwhakaora i a tatou. Ki te mea ka hokona te whenua, katahi pea tatou ka nui ake i runga i enei tikanga, inahoki ka noho tahi tatou ki a ratou, ka whangai hipi, kau, hoiho hoki i roto i enei tikanga e whakapuakina nei, kia rongo tatou i korerotia e Te Makarini, ki o tatou taringa. E pai ana ki aku whakaaro kia he tatou, he ki runga i enei tikanga, kia ora tatou i runga ano i enei tikanga, e pai ana ra. Kua whakaaro maua nei ki runga i nga tikanga pai e korerotia nei e te kaiwhakahaere tikanga, ara, e Te Makarini. Ka rongo nei maua ki ana korero, ka ora ake o maua nei ngakau, e takoto mate ana hoki o maua nei ngakau i runga i nga tikanga Maori. Na, no muri iho ka rongo maua ki te tikanga ki a Te Makarini, e mea mai ana ki a maua,'E tama, ki te mea ka tuku mai e korua to korua kainga ki a te Kuini, katahi korua ka ahua tangata i runga i to korua kainga.' Katahi ano maua ka whakaaro, e koia ano, na, ka huri maua nei ki o maua nei whakaaro, ka ahu ano ki runga i te whakaaro Maori pohehe, rapu noa a te kitea tetahi whakaaro pai i runga i nga tikanga Maori. No muri iho ka ahu maua ki te rapu tikanga i runga i a Te Makarini tikanga e korero ai ki a maua. Ka mea ano te wahi o te whakaaro Maori, e koi raru taua. Ka mea mai ia, 'Tahuri mai ki ahau kia ahua tupu tangata i a korua i runga i to korua kainga.' Ka mea ano te whakaaro Maori, e kore hoki e pai to maua nuinga ake, inahoki kua riro noa hoki to maua nei kainga. Ka pehea ai te maunga o te mana tino tangata i te mea ra ia e mau ana to maua nei kainga e rangatira ana maua nei. [Note to the side] E ta, e Wiremu, kia pai te mahi ki a Te Makarini [No signatory]