karaha. Ki te rongo te iwi nei i nga karaha e patua ana ma konei ka mataku’. Ka eke te katoa o te ope nei, ko nga toa i te tuatahi. Ko Te Rangituoro tetahi o enei toa. Kua eke ka timata te hamahama i nga karaha. Ka mataku te iwi nei. Ka timata ki te aue. Kei te aue tonu ka patupatua ratou e te ope o Te Rangitamaua. A i tenei wa kua eke mai te ope o Ngapuhi ki Tarapata, ki Kaituna, ki nga pa katoa o Ngati-Manaia. Ko te tokomaha o Ngati-Manaia i mate ki konei. Ko nga mea i ora i oma ki tena wahi, ki tena wahi, ki Whananaki ki te takiwa o Akarana, aara ki nga wahi kua whakahuatia ake nei. Ko Te Mauria Mai o Nga Namu Me Nga Waeroa I a ia i haere mai ai ka mauria mai e ia nga namu me nga waeroa. Ko te take i haria mai e ia nga namu me nga waeroa mo te hunga i haere mai i mua i a ia, kore i homai i nga hakari mana, ka mea ia me mau mai e ia enei ngarara, mo te taenga mai ki konei e kore ratou e ata noho. Ka kainga ratou e te namu, ka raruraru tonu ratou ki te raraku, ka kainga o ratou kanohi me nga wahi katoa o o ratou tinana. Na koia ra te take i mauria mai e ia enei ngarara hei whakararuraru ite noho a nga tangata i Niu Tireni nei. Ko tenei wahi ko Taupiri ko te wahi tenei i tukuna ai nga namu me nga waeroa. Kei te takiwa o Pewhairangi kei te taha whakaroto o Motukokako, ara o Maunganui, o te pa i noho ai a Manaia. Ka u ki reira a ia, ka takoto tana waka ki reira. Na i haere mai ia ki te rapu raku nui hei waka nno mona, ara he kauri. Ka tae mai ki reira ka mahia e ia te waka ka puta he awha i te wahi e mahi ana ratou i reira. Tae rawa atu kore e puta te waka a, ka pakaru te waaka. Ka mahue me nga namu katoa i reira, me nga Waeroa. Na ka haere nga uri o nga namu nei kapi katoa a Aotearoa i te namu. Ko Te Harengamai o Puhihiko Makukurangi i te Wahi o Whakatane I rere mai a Puhi ki Ngapuhi. I tona haerengamai i haere tika tonu mai ma te taha moana, a, tae noa mai ki Whangarei. I waho o Whangarei i reira a Manaia e noho ana. Ko te ingoa o taua wahi ko Te Whara. Ko te take i huaina ai taua wahi ko Te Whara, na te mea tanga atu a Manaia ki a Puhi i runga te maunga: ‘Kei whara koe e Puhi i nga tai e haruru na.’ I reira e kohi pupu, paua kina ana te pononga wahine a Manaia, te taha moana, ka kite mai i a Puhi ma, ka haere ka huri mai te tou ki a Puhi ma. Katahi ka makutungia mai e nga tohunga o Puhi, a tu tonu atu i reira hei kohatu. Ka huaina tenei wahi ko, ‘Te Wahine iti a Manaia.’ Ka haere a Puhi i reira ka tae mai ki te wahi