KO RONA Ko te korero tara tenei mo Rona. I tetahi po atarua ka haere a Rona ki te utu wai; e mau ana i te ringa, te kete, he taha I roto. I te haerenga atu ki te wai ka taka te marama ki tua ki te kapua, rokohanga iho he ara kino, a, tutuki noa te wae ki nga rakau. No konei, ka riri ia, a, anga ana ka kanga ki te marama, ka mea ake, “Pokohua marama te puta mai koe kia marama.” Ka riri i konei te marama ki te mahi a Rona ka rere iho ia ki raro ka mau ki a Rona. Ka pupuri a Rona ki te rakau e tupu ana i te taha o te awa, otiia, hutia ana te rakau haere katoa nga pakiaka, kahaki tonu atu i a Rona, te rakau, me tana taha wai. Ka taria nei te hokinga o Rana ki te kainga ka haere ki te whakatau. Rapu nei rapu nei, ka pa te karanga “E Rona, e Rona, keihea koe?” Ka karanga iho tera, “E! tenei au te kake nei i roto i te marama, i te whetu.”