TE RAE O TE RA na Te Mahuika Kaikoura Kohe rae te ra nei, he rae hamama ki nga ao! Ko kura kei te pohutukawa a Mahuika Kei te maro o Rai'atea Kei Taputapuatea, te rae o Te Opoa e! Haere mai ana, ki ahau nei, te waiata Na te ara o te wai roa, Na te ara nui o Kahukura. Haere mai ana ki ahau te ngeri o raurangi e. Karanga ki ahau i roto i te rae o te po— Te Marae pouri o Whiro e Noreira ko ngaro au! Engari, E Karanga Ki ahau, E Hina, I roto i Te rae o Te Ataahua, noreira mehoki ka tito au! Ka tito au te waiata o he ao hou; Ka tito au o te kakara kowhai kei te Hapuku! Ko reira he whenua ma. Ka tito au te tiwhaiwhai kakariki e I runga i nga ronaki o Kaitarau. Te ngaherehere o te atua-maori Ko te tiwhaiwhai ra! No reira, he rae ko te ra nei, Te Tohunga ko Te Ra! Ko te ra naku e! Te Ihinga-moana, ko tera toku patere. Ko he rae te ra nei, he rae hamama ki nga maunga. Kura kei te rata! Kura kei te maro kura o Rai atea Kei te pou tapu o Opoa e Kei Tapu Tapuatea.

KUA MATE A OPO na Hoterene Keretene Kahore i mohiotia tera te ika nei a Opo ka tangohia atu e te Atua. He ika tenei i arohaina e te mano kaumatua, tamariki hoki mona i pai ki te whakahoa ki tetahi tamaiti kohungahunga ko Julie Baker, he kotiro pakeha. Na tenei kohine ka rarata a Opo—a ki te korero i pangia te kohine e te mate, a ka noho ki te kainga mo te rua ra. Otira e tutaki ana raua i nga ra katoa i mua atu! Na wai a ka whakamomori a Opo a ka huri ka rapu i te kohine nei. Heoi ano ra e penei ana te korero ka whakamomori te ika ra a haere ana, ki te whakamate ia i a ia ano! Kaati ra he nui te mano i heke nga roimata. i tangi hoki i te rongonga kua mate a Opo. Kei te mohiotia ra nga korero mo tenei ika—heoi ano ta te Maori he korero i ana korero! He ika tenei no te hapu i haerea mai ai e Kupa Aotearoa—a tera pea ko te uri ano tenei o te ika i horomia ai a Hona te poropiti wete a te Atua i tona tononga kia haere ki te kauwhene ki te iwi o Niniwa! Whai hoki he ika aroha ki te tamariki—engari kahore i pai ki te pakeke. I ki ana Hohepa Heperi he ika tapu a Opo—a i heke mai i nga tupuna! Ae pea engari kia manawanui ki nga korero Maori. He pai ki te taringa a he kino ki nga mahara! Anei to kuri tata nei ano o te wa kainga to Tori ranei to poaka ranei to hoiho ranei? Kia pehea enei kararehe aroha!

HE POROPORO A TE WHAKAMUTUNGA Kia R. T. Kohere - na Tawhai Kohere E Re-i te hokinga ki Rangiata ka kite ahau e piko ana nga matenga i te pouri o Pukeamaru o te Whetumatarau o Maungaroa o Taumatakaka o Ahikaroa o Tiki me te motu o Waiawa. Ka rongo ahau e tangi ana nga wai o Awatere o Orutua o Waipapa me Tunanui. Ka rongo ahau e ngunguru ana nga tai o te akau o Kariri o te Hekaroa o te Wharariki o Orutua o Tokararangi o Hautai o Pouretua o te Puarata. Ka kite ahau e wiriwiri ana nga rau i te mamae o te waha o Rerekohu o Teteko nga rata o Orutua o Tapuarata. Ka kite ahau e puare ana te tatau o Tipene. Ka puta mai a te Houkamau a Hori Mahue me ta raua ope ka mauria korua. Tae atu ki Awatere ko Tuwhakairiora me tona iwi. Tae atu ki Orutua i reira a Mokena raua ko Hone Hiki. Tae atu ki Taumatoakura ko Tuhorouta me tona hapu. I te Rangiotara ko te Whanau-a-Hunaara. Tae atu ki Rangiata e tu mai ana a Po me ana mokopuna a Henare me te Kuata a Rangitakaia me Kaiawa. Ka mutu ka waiata nga ope “E hike ma e huia mai tatou.” Ka rongo au e ki atu ana koe ki a Kaka. “E te moe e te moe ta te Atua rongo ngawari hoki mai ki te pehi i aku kamo. Ki te wahi o te warewaretanga. “E te po kei hea tou wero. E te mate kei hea tou wikitoria.” Haere ra.