A TAWHAKI TE TOHUNGA WHAI POAKA I te ata po tonu, ka tae mai a Te Tomo ratou ko Ngaheu me Tame. I a Ngaheu ta ratou pu; i a Tame raua ko Te Tomo nga kuri e arahi haere ana. Ko enei kuri, he tino pai mo te whai tia, mo te hopu poaka, mo te ngau tangata hoki. Na te nui o te pahupahu o nga kuri nei, ka oho a Tawhaki, ka ki atu ki ana hoa, “E haere ana koutou ki hea?” Ka mea atu nga hoa, “Maranga! Haere ki te hopu i to hoiho.” Ka patai a Tawhaki, “Hei aha ai?” Ka whakahoki nga hoa, “Kia haere ai tatou ki te ngahere.” Na tenei ka koa katoa a Tawhaki, a, kaore i roa ka puta mai ki waho. Katahi ka mea atu ia ki ona hoa, “Ma koutou e hopu taku hoiho, kia haere au ki te whaka-koi i taku naihi.” I mua o te haerenga o nga hoa ki te tiki i tonu hoiho, ka mea atu ano ia, kia herea a ratou kuri he tino nui no te hoihoi, kei oho hoki ona matua me ona taina. Ka haere ona hoa. I te taenga atu ki te taiapa, kaore te hoiho i roto, kua puta ke kei waho haerere ai. Ka mea atu a Te Tomo ki a Ngaheu raua ko Tame kia aia mai. I te omanga mai o te hoiho kaore i haere mai ma te keeti, engari hupeke mai ana i te taiapa. Ka mea a Tame ki ona tuakana, “E hoa ma, e hara tenei mea, i te hoiho engari he tia ke, i tona kaha hoki ki te peke i tenei taiapa. Akuanei pea eke rawa ake a Tawhaki ki runga ki a ia, kaore ke he take.” Ka mea atu a Ngaheu, “Ka kore e mau ia tatou me tuku atu ma nga kuri e whaiwhai kia ngenge ai. Heoi, kaore i roa ka mau te hoiho. Hoki rawa atu ratou ki te kainga, e tatari mai ana a Tawhaki. I mua tonu i te whitinga o te ra ka ngaro atu ratou ki roto i te ngahere. Ko nga kuri kei mua e oma haere ana. Ka huri atu a Te Tomo ki o ona hoa, ka mea atu, “E hoa ma kua oma a tatou kuri, engari, e mohio ana ahau kei te whai tia.” Mutu ana tana korero, ka rongo tonu atu ratou e pahu haere mai ana nga kuri. Tu ana ratou ki te whakarongo. Ka ki atu a Tame ki a Ngaheu kia whangaia he mata ki tana pu, ki tona mohio hoki ka puta mai taua mea kia ratou. Mutu kau ake tana korero e oma mai ana he tia. Ka ki atu a Tawhaki, “Ana e hoa! puhia!” I te pakutanga o te pu, kaore ke i tu. Oma atu ana te tia. Ka mea atu a Te Tomo, “E hoa, kaore o take. Homai te pu ki au, tera pea he pai ake ahau i a koe.” Ka mea ano a Tame kia noho ratou ki te tatari i nga kuri. I te taenga mai o nga kuri ka tuku a Ngaheu ki te patu, ki te kaha o tana riri i te korenga i mate te tia. He mea kino hoki tenei, mo te kuri whakangau poaka ki te whaiwhai tia. Tae rawa ake ki te poaka kua ngenge ke. Ka haere ano ratou. Ka piki haere i te hiwi, ma nga huarahi kararehe. I te ekenga ki runga ka oma ano nga kuri. Ka rongo ratou e pahu mai ana. Ka mea atu a Te Tomo ki ona hoa ko ratou e noho ki te tiaki i nga hoiho, engari ko Tawhaki e haere hei hoa mona. Ka oma raua. I to raua taenga atu, kei roto te taringa poaka i te puare o te rimu, ko nga kuri kei waho e pahu atu ana. Ka whakaaro nga tokorua nei, hei aha e puhia ai, engari me hopu e raua. Katahi ka whakatata haere atu a Tawhaki. Ka ki atu a Te Tomo kia haere ia ma tua, ko ia ma mua. I te kitenga atu o Tawhaki i te poaka ka karanga ia ki tona hoa, “Kaore e mau i au, he tino nui rawa.” Ka mea atu a Te Tomo kia werohia mai ki te rakau, kia puta mai ai ki waho. Ohorere ana te poaka ka oma mai ki waho. Katahi ka tumeke a Te Tomo, ka piki ki runga i te rakau, ka mahue te pu. I te omanga mai o Tawhaki ki te pu ka kite i te poaka, ka whaia. Ka piki hoki ia ki te rakau. Kei te pahupahu nga kuri, kei te ngau hoki i te poaka. He tino maia enei kuri. Ka ngaua haere tia e ratou te poaka nei a hoki ana ki tona rua. Ka mea atu a Tawhaki ki a Te Tomo, “Homai pea, ki au te pu. Kaore e pai ki a koe, he mataku nou. Ka mahue i a koe te pupuhi, ka piki ke koe ki runga i te rakau.”