Photo: Barry Wood E mau atu ana a Tawhaki ki te pu ka ngaua mai e nga kuri te poaka ka oma mai ano ki waho. “Ana e hoa, puhia!” e ki atu ana a Te Tomo. Ka paku te pu. Auahi katoa, engari e tu tonu ana te poaka—he tu wairangi nei! Ka mea a Te Tomo, “E tama, i puhia e koe ki hea?” “Ki te mahunga” ka whakahoki atu a Tawhaki. Ko te poaka nei, kei te mau i nga kuri inaianei. “Kao!, i tu ke i a koe te taringa. Kaore koe i pai ake i au mo te pupuhi,” ka mea atu ano a Te Tomo. Ka ki atu a Tawhaki, “E mohio ana au, e piko ana te ngutu o tenei pu.” Ka mea atu ano a Te Tomo, “Homai maku e pupuhi, kei puhia e koe tetahi o nga kuri.” Ka paku te pu, ka mate taua poaka; werohia atu hoki te kaki kia puta ai nga toto. Tae rawa mai a Tame raua ko Ngaheu kua ka te ahi hei hunuhunu i ta ratou poaka. I te tino nui o tenei poaka e wha ke ratou hei hiki ki runga i te ahi. Kaore i roa ka mutu te hunuhunu, ka tapatapahia kia uru ai ki nga pikau. Ko te taha nui ka hoatuhia ki a Tawhaki, no te mea he nui ake tana whanau. Ka koa katoa ratou mo to ratou waimarie. E huri ana te ra ki te ahiahi ka hoki ratou, mete riri haere ano o te hoiho o Tawhaki no te tino taumaha rawa o tana pikau. na Moko ko raua ko Penehio