Atawhaingia Te Pā Harakeke

Muka, Volume 20, Issue 1, 1 September 2007, Page 1

Atawhaingia Te Pā Harakeke

Ohorere ana matou i tenei wa, na te nui o nga tamariki Maori e tukinohia ana i roto i te tara a-whare. Ahakoa taea ai e tatou te ki, na nga taumahatanga o te mahi whakakainga a te Pakeha tenei ahuatanga; ahakoa taea e tatou te aro kore ki nga mahi whakaputa korero a te hunga papaho e pa ana ki enei, me whakaae ano ra tatou, kaore e taea te karo te korero, kaore a tatou tamariki i te manaakitia hei taonga, na reira ka tangi te ngakau. Kei te tiro au ki tenei kaupapa me taku hangai kite whakaaro, me ahuru ke tatou i nga whakatipuranga, a tatou tamariki, hei wahanga nui o to tatou hiahia kia ahuru ai, kia ora ai to tatou reo. Ina hoki, ma wai e kawe to tatou reo i nga ra kei mua mehemea kei te tuku tatou kia tukinohia te kaikawe i te reo, ara ko a tatou tamariki? Ka pehea ke te korero mo te tangata e ki ra, ko te tangata te mea nui rawa atu o te ao, ina hoki, kei te marama tatou kaore i te penei rawa te manaaki i te katoa o a tatou tamariki. Me pehea tatou e whakatinana i te whakaoranga o to tatou reo, i a tatou e mohio nei, kaore i te tika ta tatou tiaki i a tatou tamariki, e puta ai te oranga whai kounga. He pai ki a au te whakaaro taketake, ko te whanau "te pa harakeke". I a au ka whakaaro i tenei, e kite ana au i nga rau pakere o te harakeke e potae ana i nga tipu tokotoru kei te pu o te harakeke, ara, ko te whaea, ko te papa, ko te tamaiti. E kite atu ana au i te whanau whanui e karapoti ana, e tautoko ana, e mau ana kite oranga o taua putake i te mea, ko ia te take matua o tona tipu hei tipu kotahi. Ki te mau i te whakaaro nei ki roto i te horopaki o naianei, me whakaae ra tatou, ehara ko te whanau pu anake te take e puta ai te mahi tukino tamariki, engari he take tenei e pa ana kite

hapori, me nga uara o taua hapori. E whakarite ana Te Taura Whiri i te Reo Maori kite mahi i te taha o nga pokapu me nga whakahaere e mahi ana kite kaupare i nga ahuatanga tukino i te hunga tamariki. I tenei wa tonu kei te whakamaori korero matou ma te hotaka SKIP e kawea nei e CYF mete Manatu Whakahiato Ora. E tautoko ana hoki matou i te

hotaka e kiia ana ko 'Atawhaingia Te Pa Harakeke' e whakaratohia ana i tenei wa e te Tahuhu o te Matauranga. Kua penei ta matou aro i naianei, i te mea e whakapono ana matou, he mea nui ano te mahi atawhai tamariki, pera tonu kite nui ote mahi whakaora ite reo. Kaore e taea e tetahi te whakakore i tetahi atu.