Verina Wihongi – Wahine Toa mō te Taekwondo

Muka, Volume 17, Issue 1, 1 March 2005, Page 3

Verina Wihongi - Wahine Toa mō te Taekwondo

He tuatahitanga mo te haere ki Atene! He toa a Verina Wihongi ki te hakinakina e kiia nei ko te Taekwondo. He tatua pango reanga tuatoru tona a, ko ia te wahine tuatahi, te Maori tuatahi ano hoki kia haere ki nga Kemu Orimipia mo te whakataetae Taekwondo. I runga i tona tohutoa koura i nga Kemu ki Ahia, katahi ka tonoa ia kia tu hei kaipara mo Aotearoa i nga Kemu ki Atene. I te tau 1996, i riro i a ia te tohutoa hiriwa i nga Kemu mo nga whenua i raro i te mana o te Kuini o Ingarangi. I te tau 2001, i riro hoki i a ia i te tohutoa koura i nga Kemu ki Korea. Ehara te taekwondo i te hakinakina tuatahi i kitea ai ona pukenga. E kao. I a ia e rangatahi ana, he toa kite oma, ara ko te 100 m, ko te 200 m, ko te 400 m, ko te peke roa hoki ona eketanga. Ko ia tetahi o nga toa o te rohe o Waikato i aua wa. 1 naianei, kua rereke tona titiro. Na tona matua keke te akiaki kia uru ia kite karapu taekwondo i Taneatua. Tekau ma tahi tona pakeke i taua wa. "Kaore au i te tino aro ki te hakinakina i taua wa. He mea whakahoahoa, he mea whakawhanaunga noa iho" te ki a Verina. Engari haere tonu ia ki nga akoranga e toru ia wiki. Ka tekau ma rima ona tau, ka whakawhiwhia ia ki te tatua pango iti, katahi ko te tatua pango.

“I taku whiwhi i taua tatua pango iti, i hinga ahau i tetahi whawhai i te whakataetae a-motu. I te toa ahau i nga whawhai katoa i mua i tera. He tuatahitanga tena maku. Ahakoa tera, i akiakingia au e nga tohunga taekwondo huri noa i te motu kia haere tonu, kia whai i te hakinakina nei, kia tae ahau kite tihi o te maunga” ko tona ki. No Nga Puhi, no Ngai Tuhoe ia. A, i te tiaki pamu a Verina raua ko tona hoa rangatira a Ngatai Hurkmans, no Ngai Tuhoe, kite tonga o Otakou. Kei reira tonu raua tahi e whakahaere nei i te karapu taekwondo o Clutha Valley. Engari and mo nga haora me whakapau ia mo te hakinakina i enei

ra hei whakapakaritanga mona. Kua mutu tona mahi pamu, ka rima haora ia ra ia e whakangungu ana. Ehara a Verina i te wahine tino taroa. Kotahi mita, e ono tekau ma waru henimita tona tu. Ko te taroa o te nuinga o ona hoariri ki Atene, kotahi mita, e whitu tekau ma rima ke. Ko te taumaha o tona ropu whawhai, i waenga ite 57 kite 67 kirokaramu. "He tino wero tenei whakataetae ki Atene. Kua waitohungia nga kaipara katoa i raro i nga waitohutanga o te ao. Ko te nuinga, no Korea, no Haina hoki. He tino toa rawa atu ratou katoa!

"Waimarie ahau he tatua pango hoki to toku tane. Ko ia te tangata e akiaki nei i ahau i nga wa katoa kia parakatihi, kia haere kite whare kori tinana. Ko ia hoki taku hoa whawhai. He kaita ake ia i ahau. He pai hei hoa whawhai moku." Na reira, ko te patai i naianei, ko wai ra o te tokorua nei te tino toa mo te whawhai? "I a maua e whawhai ana i nga akoranga o te karapu, ka

whakahe maua i a maua ano mo nga maka. Heoi ano, i etahi wa ka toa ahau, i etahi atu wa ko ia ka toa " me

tana menemene mai. Oti ano ra, kei runga noa atu a Verina mo te taekwondo i tenei wa. Ko ona hiahia mo nga tau e whai ake nei kia whakaako tamariki a, kia whakaako tamariki Maori ki tenei hakinakina. "He tino pai te taekwondo kite Maori. Ka pakari hoki te ngakau titi. Ka whakatikangia koe e koe ano! Ko te nuinga o nga kaiwhawhai tino pai i Aotearoa nei, he Maori." Kia kaha ra e hine kia eke and ki te taumatatanga. Ka wani ke to mahi!