’Aua ne’i e muimui

Mana (Auckland), Volume 1, Issue 8, 13 October 1977, Page 6

’Aua ne’i e muimui

Ua mae’a atu nei le palotaina o sui mo le fono a itumalo mo le isi tolu tausaga. O i latou sa galulue ma fesoasoani i sui ta’itasi sa fa’atutu, ua fa’apea nei, se fa’afetai ua ’uma atu lenei fa’atalatala. A ua ’ese ai lea ia i latou ua fihfilia nei mo fono a itumalo, ua fa’atoa amataina nei la latou galuega mo le isi tolu tausaga o lumana’i nei.

Sa tele ’ese’esega i manatu ma talitonuga o e sa fa’atutu a’o lumana’i le palota, ’ae talosia ia, o ni fe’ese’esea’iga ma ni ’upu tau fa’ato’ilalo sa fa’a-salalau i taimi o sauniuni mo faiga palota, ia fa’ate’a ia i nu’u le’aiga, a ia so’o fa’atasi nei ma galulue felagolagoma’i ina ia manuia tagata i itumalo ta’atasi ua tofia nei iai latou te tausia.

O nisi o fa’ai’uga e pasia e le fono a le itumalo, e sili atu ona a’afia ai tagata o sea pitonu’u i lo nisi o fa’ai’uga e fai e le Palemene. Afai la e te

le’i palota, ’aua fo’i ne’i e muimui pe afai o le a le manuia galuega ma taumafaiga a sui mo lenei tolu tausaga. O lo’o fa’aalia pea le fa’atamala o le_tele o tagata o tatou ona o le le palota, ’ae ia manatua, o tatou lava ma a tatou filifiliga e manuia ai itumalo po’o pitonu’u o lo’o tatou nonofo ai. E fa’afetai ua mafai ona ofi nisi o tatou uso i le mea o lo’o filifili ai ni sui e tofia mo matagaluega a le malo, e iai le Falema’i, Eletise ma le Ava ma Gataifale o Aukilani. O le Tofa a Pua Sofi sa fa’atu mo sui o Aukilani, a’o Mara Niumata mo Mt Albert, o Samoa ia. Ua le fa’amanuiaina le taumafai i le Tofa a Pua a ua filifilia le tama’ita’i O Mara Niumata o se tasi o sui mo Mt Albert. Ia tau ia ina ia manuia nei nofoa’iga fou ua filifilia nei ina ia maua e tagata lautele se manuia mai a latou filifiliga ma fa’ai’uga, ’ae le o se manuia mo latou.