27 Oketopa 1848 No Wairarapa E tama, e te Kawana Kerei, Tena koe. E ta, e Kawana, kua whakaae matou kia utua to matou kainga. Katahi ano matou ka whakaae kia tukua to matou kainga. Katahi ia a matou te take nona te kainga ka whakaae, ina ia te kore ko etahi Maori e ki na i a ia, a Wairarapa. Heoi, e ta, ko te kaha o te pupuri, kua kahore inaianei. Ko tenei, kua whakaaetia e matou te tikanga tuku. Ko to matou kaha, ko te kaha whakaae kai a matou katoa, inahoki rongo mai koe, kua whakaae katoa nga rangatira o Wairarapa, kia tukua to matou kainga. E tama, pono rawa tenei korero, kei ki koe he teka tenei korero na matou, otira pono rawa. Ko ta matou nei whakaae tenei ki a koe, otira mau hoki tetahi wahi whakaae ki a matou. Ki te whakaae wawe koe, kia hohoro mau te pukapuka ki a Kapene Kerei, kia rongo mai ia katahi ano ka whakaae nga rangatira katoa o Wairarapa, puta noa puta noa, nga wahine, nga tamariki, nga koroheke. E ta, ka tohe matou kia tukua to matou nei kainga. E tama, kia rongo mai koe. Ko tetahi taha o to matou kainga e tukua i te ngutu awa ano, a puta noa ki te kauru. Ko te rohe o tatahi ko Turakirae, ko Te Kotukutuku te rohe mai o runga, puta noa ki Rangitumau; ko Wangaehu te rohe o te taha ki Maungarake, ko tenei taha ano mo matou, puta noa ki te ngutu awa. Ko nga tino rangatira Maori tenei kua whakaae kia tukua a Wairarapa: Ko Tetati ko Haimona Pita ko Taki ko Te Warihi ko Raniera Wiremu Kingi Ngairo Maraea Toatoa No waho nei enei rangatira kua whakaae: Ko Matepoti ko Pape Hemi Te Miha Iraia Te Ama Ko nga rangatira o waho enei kua whakaae: Wikiriwhi Te Nohu ko Anaru Rongotua ko Te Ropiha Te Waitai ko Hamuera Rangi No te kauru enei rangatira kua whakaae, haunga ia te katoa: Hamuera Koreneho ko Wiremu Te Rangi Andrew John, kaituhituhi