E hoa, e Makarini, Whakarongo mai ki ta matou tikanga. Kia kaha koe ki ta tatou nei tikanga. Kua rongo ano na koe ki aua aku kupu na, no konei i kaha ai te whakapehapeha a te pupuru whenua. Na, ko Ahuriri me ata noa iho marire, no te mea e roa ana, na reira kahore he ngaru i te uta ki runga, engari ko tenei ki mua kei a koe te tikanga mo nga Pakeha. I mea to matou whakaaro, me homai rawa nga Pakeha, kia rua rau. Na Hone Waitere, na matou katoa Ki a Makarini 5 Hune 1851 E hoa, Ruini, Tena ra korua ko to Pakeha. Ka nui to matou aroha atu ki a korua ko to Pakeha. I mea i muri i a korua ka puta te kupu a Riwai mou, otira mo tatou katoa, i mea a Riwai kei a ia katoa te tikanga mo te whenua. Ka puta katoa a ratou kupu, ta Riwai, ta Hamuera, ta Wiremu, ta Mihana, ta Wiremu Tuainane, ka puta ta ratou ki, kia tahutahuna nga whare, kia kainga nga kai, i mea ra mana te tikanga ki nga Pakeha, ka haere mai ai ki konei. Kahore matou i pana kupu atu, i mea matou ko to tikanga, no reira matou i korero[?] ai. Heoi ano, ka mutu. Ki a Ruini [No signatory]