Paripari 11 Nowema[?] 1850 E hoa, e Kawana, Tena ra ko koe. E tama, tenei ano ta matou nei tikanga. Kia rongo mai koe, ko tenei ko to matou whenua, ko Te Paripari, ka tukua katoatia atu e matou ki a korua ko Te Makarini. Ko ta korua korero ko Te Watarauihi i tou taenga mai ki Waikanae i mua, i tau kupu i ki mai ai ki a Te Watarauihi, kei a koe te whakaaro ki a ia mo te wahi kua riro ki roto i te rohe mo nga Pakeha. Kua whakaae ia ki tou aroaro, ki tau kupu, ko tana whakaaetanga kua waiho ki a matou. E to matou nei matua, e Te Kawana, ko ta matou nei whakaaetanga tenei ki a koe, me tuku katoa atu ki a koe tenei whenua, te wahi i riro ki roto ki te rohe me te wahi i toe. Me whakaae mai koe ki tenei whakaaetanga a matou, mo tenei whenua mou, me whakaae mai koe. Naku tenei pukapuka, na tou tamaiti aroha Na Natanahira Watarauihi ki toku matua aroha, Kingi Kerei, raua ko Makarini