No te Ratapu, 18 Maehe 1849 Ki Werengitini, Poneke Ki a Ihaka E ta ma, Tena ra koutou katoa. Tenei te korero kia rongo mai koutou. Tena te kaitiki atu i nga moni mo te whenua, mau e mea atu ki to Pakeha, ki a Kawana Hea ranei, ki a Kawana Kerei ranei, kei kuware raua ki te homai i ta raua na hikipene. Kahore ano i ata totika te whenua te korero. Kia mau te pupuri i tau moni koi tae atu te korero. Kua hui nga rangatira o Heretaunga, ki te whakaaro o nga rangatira o Wairarapa he mau mai e ia tana moni, kia mau tana moni. Kahore ano matou katoa i whakaae noa, kei te pupuri tonu ano matou. E ta, kei te tangi tonu ano matou ki to matou kainga, e kore e mutumutu ta matou tangi. E ta, tena matou te haere atu na, tenei he raru ki te kaihomai i te pono, penei kua riro tahi atu. Ka mutu ki a koe. Ki te Kawana, kei Poneke E ta, Tena ra koe. E ta, tena matou te haere atu na mo te korero mo to matou whenua, ta te mea kei te pohehe te korero a etahi o matou, kahore ano i rite i a matou katoa; tohe noa na kia homai ma ratou anake nga utu o te whenua. Kahore ano i whakaae matou nga tangata o Ruamahanga puta noa ki nga rohe katoa. E ta, Kawana, kei homai e koe he mea whakahinga, he mea whakahe. Ki te mea ka homai e koe, katahi ka kitea e matou tou he, nau tena kino ki Raumahanga, ki toku kainga, a, ko wai hei utu mo tenei kino - ko tatou ranei ko nga tangata kua whakawanatia nei e Ihu Karaiti? Tena kia whakarongo mai koe ki tena korero, puritia atu tau moni a ka pai, ta te mea ko te putake tena o te kino, ko te moni, ta te mea, e ta, kua hua i a tatou Nga Mahi 15:9. Ki Ngaitawirikura, ki a Te Puni, ki a Ihaka, ki a Kawa [Note following] Na Matiu Retimana Te Korou. Ki Poneke, ki a Te Puni, ki Kawana