24 Mei 1852 Haere ra, e taku pukapuka, ki Poneke ki a Te Makarini. E hoa, Tena korua ko to hoa. Tenei taku kupu ki a koe, moku tetahi taonga i a koe, hei taonga hokohoko moku ki nga tangata o tenei kainga o Heretaunga, i nga hanga ranei o Te Weiti, i etahi hanga ke ranei o etahi Pakeha noa ake. Mau e whakarite ki tetahi Pakeha hei kawe mai ki au i nga hanga. Ki te pai a Te Weiti ki ena hanga kia tukua mai ki a au, e pai ana. Ki te kore e pai ana, engari mau e rapu atu ki etahi hanga, i etahi Pakeha rangatira tetahi hanga moku. Tenei he ngahau noku i nga tangata e haere ana ki te tiki hanga i a Hanara, kia tu mai ratou hei Pakeha. He maha nga kaihoko a Hanara, na kona au ka tuhi atu ki a koe ki tetahi hanga hoki moku i a koe. E hoa, kia Pakeha rangatira tetahi hone moku, ki Poneke nano [nona?] noho mai ai, kaua he Pakeha ki Heretaunga nei; ko ahau anake ki konei hoko ai, engari ki kona tonu ano te tangata nona nga taonga noho mai ai. Maku tonu e hoko atu i konei, ka kawe atu (a) nga utu ki a ia, kia hoki te utu o te taonga - o te paraikete, o te hu, o te tarau, o te koti, o te aha o te aha o nga tini hanga o te Pakeha. Ki te pai mai koe, tuhia mai ki a au, kia hangaia he whare moku. Ka oti te whare ka rere mai ai te kaipuke ki te homai taonga moku, he rapu mahi naku kia tawiwi ai au i tetahi rawa moku. Ko ahau tonu he taenga mai mo nga hanga. Ki te mea he kaihoko ano e haere mai ki konei, mana e homai nga hanga ki au. E kore hoki e tika toku ngakau, engari rere tonu mai te kaipuke homai tonu ki au nga hanga, ka pai au kia tika ai hoki taku mahi i o taua taonga. Heoi ano. Naku na Karanema Te Nahu No Whakatu Tenei hoki tetahi kupu aku ki a koe, ko te hoiho i riro mai i a Te Whakatomo, e mea ana ia i homai e koe mana tonu tenei hoiho. Ko Pata e ki ana mana tenei hoiho, i tuhia mai ano ki te pukapuka mana. Ka mea a Te Whakatomo kihai koe i ki mai ki a ia, engari Te Tera, me te paraire, i ki mai koe ma Pata, ko te hoiho mana na tonu ano tenei hoiho.Tuhia ma e koe ko Pata ranei mo Te Whakatomo ranei. Mau e tuhi mai ki a Te Whakatomo tetahi pukapuka. Tuhia mai hoki he utu mo aku pukapuka ka rua nei ki a koe. Na Karanema Te Nahu Ki a Makarini kei Poneke