[At top] 'Copy' Ngamotu Maehe 1852 Haere ra, e taku pukapuka, ki a Nopera raua ko Tiaki. E tama ma, Tena korua me nga taitamariki, tena koutou. He aroha noku ki a koutou, koia ahau i tuhituhi atu ai i tenei pukapuka ki a koutou. E tama ma, titiro mai koutou ki ahau ki taku kotahi, me whakamutu te tohe ki Te Wairoa, no te mea na koutou i tuku, kaua hoki koutou e tango. Whakarongo mai! Ka tuaina taku huare ki te whenua, e kore e hoki mai ki taku waha. Waihoki, kaua koutou e mea, kaua koutou e pokanoa ki te whenua kua hokona e koutou ki te Pakeha, ara, ko taua wahi ko Te Wairoa i tukua atu, kaua e puritia, tukua atu. E kore e taro ka poto nga kai e tupu ana ki runga ki taua wahi, hei reira ka tukua mai ki au. E tama ma, kaua koutou e noho he ana ki runga ki taua wahi kua tukua mai nei e koutou i te tekau ma wha o nga ra o Nowema i te tau o to tatou Ariki, kotahi mano e waru rau e wha tekau ma iwa, he whenua tuturu tonu iho mo nga Pakeha, ake tonu atu. Ko taku tohe tenei ki a koutou, kia haere marie koutou, whakaae mai koutou kia mau te whakaae kia whakamutu te tohe inaianei ano, kia koa ai taku ngakau ki tenei tuhituhinga atu ki a koutou. Ko tenei pukapuka me pupuri tonu e koutou, kei maka, kei ngaro ranei, me tiaki tonu taea noatia te mutunga. Ko te mutunga, koia tenei, ko Te Wairoa kia tukua mai, ko Te Wairoa kia tukua mai. Heoi ano. Na to koutou hoa aroha, 'signed' na Hare [At top] 'Copy' Raromiti 30 Maehe 1852 E hoa, e Tiaki, e koro, e Nopera, I te tekau ma wha o Nowema e kite ana koutou i au i reira, i te whakatakotoranga o nga utu e rima tekau pauna. Ka pakeke a Nopera ki reira kia hoatu he hoiho mona, ka rapu kau ta matou whakaaro i reira, ka whakangawaritia te tikanga a Nopera ki reira, i te tekau pauna. Ka mea mai koutou kia hoatu he kaho tupeka. Kahore matou i pai. Na, ki atu matou te kore koutou e pai ki te kuao hoiho, me kawe atu ki te kaho tupeka ma koutou. I mutu i konei to matou tikanga. Ka mea mai Te Makarini, 'Heoi ano kua rite ta koutou pakeketanga ki a Nopera. Kua tae atu te tekau pauna ki a Nopera. Ko te mutunga tena a to koutou tikanga.' E mohio tonu ana ahau, muri iho kua whakatakotoria nga utu ki a koutou, kahore hoki he tikanga a koutou i toe. I rongo tonu au to kupu, e Nopera, heoi ano, e taku koroheke, kua rite. Ka mea mai koe, 'Ae'. Na, ka ki atu ahau ki a koe, 'Heoi ano pea kua rite'. Kahore koe i ki mai kia tono atu koe ki muri atu, me koe hoki, e Tiaki, i tahuti koa koutou