Ngā take i kōrerotia i tēnei hui he maha, te piki o ngā iwi o te ao (population explosion), te tiaki i ngā kaumātua, te whakatipu kai hai ora mō te ao, ngā whaea mahi moni, te ako i ngā tamariki mai i te nonohitanga, ā, tae noa ki whare wānanga, te mau ki ngā taonga a ngā tūpuna, te tūnga o ngā wāhine i roto i ngā mahi nunui, te noho a ngā iwi kiri parauri i te ao, me te nuinga o ngā take nohonga whare—te hemo kai o ētahi o tātau. I roto i ō mātau rōpū kōrero, taku kaupapa ko tā tātau noho tahi i Niu Tireni, te haere a ā tātau wāhine Māori ki te āwhina i ngā kiri mangu o āhitereiria (aborigines) ki te whakatū kura mō ngā tamariki nonohi i Box Ridge, ngā haere whakahoahoa a ngā rōpū wāhine ki Whīti, me te haere mai hoki o Whīti ki Niu Tīreni. Ka haere mātau ki te pā whakamutunga o ngā Hawaian, ko Ulu Mau te ingoa, tētahi mea whakamīharo ko te Sea Life Park; akona ai ngā wēra me ngā dolphins ki te mau ake i ngā tāngata mate i rō wai, kai te hangaia he whare i raro i te papa o te moana; nā, haere mātau ki te Bishop Museum. Ko te Rangihīroa te upoko o tēnei whare i a ia e ora ana. Ka tono mātau kia tukua mātau kia haere ki te tangi ki tō mātau whanaunga. Nā māua ko Maora Tamihana ngā maioha, ngā apakura, ā, ka tū mātau i te wāhi i whakatapua ai hei whakamaharatanga ki a te Rangihīroa. Ka haere mātau ki te whare karakia o Kawaiahao e kīia ana ko te ‘Westminster Abbey o Hawaii’. Nā, haere mātau ki te ‘Luau’—he hākari nā tērā iwi mō ngā whare noho, kātahi ka haere mātau ki te East West Centre, muri iho ki te Polynesian Village, nā māua ko Mrs Niuekirke i ārahi atu tō mātau rōpū; nā Bruce Biggs te wero i whakatutuki. Ka pai hoki te pōwhiri a Te Ngaio me tōna wiwi, ko ‘Te Urunga tū’ te haka. Te pō nui i tū ai ngā iwi ki te mahi i ngā mahi a ō rātau whenua. Ko tā mātau he poem nā Tā āpirana Ngata, ‘A Scene from the Past’. Ko ētahi wāhi i tangohia e au, nāku i kōrero, nā te rōpū i waiata, ‘Hoki hoki tonu mai’ i a au e kōrero ana. Muri iho te haka me te poi.