Io Matua Kore Whakanuia ra, Whakanuia ra, Whakanuia ra. Koropiko atu ra Ki a Io-matua-kore Nāna te kete tuauri, Ki a Io-nuku. Nā;na te kete tuatea, Ki a Io-rangi Nana te kete Aronui. I horahorahia Te mana whakaoraora, Te mana whakaihiihi, Te mana whakataputapu, Ki runga ki a Papa-tuanuku, Ki runga ki a Tangata-tu-tahi, Tihei mauriora, Ka puta ki te whaiao, Ki te ao marama. Ka noho a Tane i Te Ao nui, Te ao roa, Te ao pouriuri, Te ao maramarama, Ka piri ki tona hoa wahine Tuku mai na Io. Ka keri, Ka tou, Ka tupu, Ka puta ki te ora Ko tangata tini mano, Whakamaua kia tina, Tina, Hui e, taiki e. Tirotiro kau atu e tangata rau, Ki a Ranginui e tu mai ra Ki a Ranginui e papahora ake ra. Ki a Ranginui tiketike, Ki a Ranginui i Te takiwa, Ki a Ranginui Te ara ki Tikitiki-o-rangi, Te mātāpuna o te ora, Kia ora ra. Kia ora ra. Kia ora ra. na Rangi T. Harrison

He Moana Whakarongo ki te moana E haruru mai nei. Titiro iho ki nga ngaru E papatu mai nei. E tu, e nga kohatu, Kia kaha te tu. Puritia nga ngaru ra. Pahingia atu ki kona. Kei konei ahau Kei tenei taha ou E tu atu nei. Ko wai o tatou e hinga wawe Ko ahau, ko te kohatu nei, Ko te moana ranei? Kia kaha to tu e kohatu. e Puritia atu nga ngaru ra Kei hinga taua, e. Kia kaha, e kohatu, e Kia u! Aue, kua hinga koe i nga ngaru ra. Aue, kua hinga au i nga ngaru nei, Aue, kua mate taua. Tere haere ana taua I runga i nga huka o te moana. Kia ora, e nga moana katoa. Haere i o haere, ake ake nei. —Ani Hona