TE AO HOU

KO TE RANGATAHI HEI KAIHAUTU Kotahi ano tangata i roto o te tokowha tangata Maori kei runga ake i te toru tekau tau te pakeke. Otira i runga i ta te Maori tikanga ko nga pakeke nga tino tangata. Ko nga pakeke nga kaihautu, ma ratou ka tika ai ta nga tamariki. Na te ropu o nga tamariki o Te Aute i para te huarahi mo te Ao hou me ona ahuatanga. Na taua ropu i takahi nga marae maha o te Maori ki te kauhau ki o ratou matua tipuna i te rongopai mo te ora, mo te ahuwhenua me era atu tikanga o te Ao hou. Ko ta aua tamariki i hopu ai o nga whakaakoranga o Te Aute ta ratou kaupapa kauhau. Otira no tera wa tera ahuatanga a he putanga kotahi to tera tu ropu. Ko nga kaumatua o enei ra i tae ki te kura te nuinga. Kei te piki mai te mana o te rangatahi. Haere he wahi haere he wahi ka kitea e mahi ana nga ropu o te rangatahi ki te mau i nga rakau a o ratou tupuna, a ki te hapai i nga mahi a te iwi, ara ia kei nga nohoanga taone ka tino riro i te rangatahi nga whakahaere. Ko nga ropu o te rangatahi kei te mau i nga mahi waiata, tukutuku me era taonga a nga tupuna a ko nga mea kuare ka ahu ki aua ropu kia whakaakona. Kei te awhi nga kaumatua i nga whakaaro o te rangatahi. Apiti atu ki nga mahi Maori a nga ropu o te rangatahi, kei te karangaranga hui ratou ma ratou a ko nga mahi he takaro, he whakataetae haka, a he korerorero i o ratou na whakaaro. Ka mutu nga tino hui mehemea ka pai nga whakahaere, ara me whai take totika hei kinaki mo nga takaro. Kei te takatu te ropu whakaakoako pakeke ara te Adult Education mo ta ratou na hui ki Pamutana a te Hanuere e tu mai nei a kei te whakamau atu nga whakaaro ki reira. Ka mutu nga taonga atahua ko nga ropu o te rangatahi engari ra me whai kaupapa totika. Tetahi ka tu he ropu penei he pai tonu te tokomaha engari kaua e tokomaha rawa. Kei te oti etahi mahi o te ao Pakeha i ona ropu rangatahi waihoki taria te roanga mo o te Maori ropu.

Fit the right tyres for the job Reidrubber Best by Test *All Reidrubber Truck Tyres incorporate the Nylon Shock Shield R. G. 1