TE PUTAKE I MATEMATE AI NGA HUIA Na G. N. Lansdown I nga wa o mua, i noho hoahoa te huia me te kereru. I te ahua wawata o te huia, katahi ka mea atu ki te kereru ki te whakahui i nga manu whenua hei kimi rangatira mo ratou. I te huinga he maha tonu nga manu kaore i hiahia ki te turanga rangatira nei, katahi ka inoi atu te kereru kia homai te turanga rangatira nei ki tona hoa ki te huia. Whakaae hoki nga manu nei, waiho ana ko te huia hei rangatira mo nga manu o te ngahere. Kua roa ano e rangatira ana te huia nei, ka uru mai ki roto i a ia, te ahua whakahihi. I tetahi ra, i a ratou e noho ana i runga i nga rakau, ka kite nga manu i tetahi waka roa, a e haere mai ana mai i waho o te maona, a he tangata i roto. Katahi ka mea atu te huia ki te kereru. “E haere ana ahau ki te whakaatu ki nga tangata ra, ara ko ahau te rangatira o nga manu i tenei whenua. E hiahia ana ahau kia mohio ma ratou ki ahau”. Ka mea atu te Kereru, “Kaua koe e whakaatu atu ki a ratou no te mea kei hiahia o ratou rangatira ki o huruhuru”. Kaore te huia i aro ki nga korero a tona hoa haere atu ana, whakaatu atu ana ki nga tangata nei ara ko ia te rangatira o nga manu. Kaore hoki i roa ka whakaaro nga tangata nei a e tika ana kia mau o ratou rangatira i nga huruhuru o te whiore o te manu rangatira nei a tango ana ratou i nga huruhuru nei. Na runga i tenei ahua korekore ana nga huruhuru o te huia a mate atu ana. No reira kei te noho mokemoke te kereru me te whakaaro ano hoki pea a mehemea i whakarongo ano te huia ki ana tohutohu.