TE AO HOU Nga tuhituhinga i te wahi nui o te pukapuka nei i tuhia hei whakamaharatanga ki a Te Rangihiroa, ara, ko te kaupapa—te kimihanga matauranga mo te tamariki Maori—he kaupapa, i whakaarohia ka whakaae ano ia he kaupapa tika. Tekau ma rima nga tau inaianei mai o te whakaaetanga ki nga kaupapa hou mo te ako i roto i nga kura o Niu Tireni, a ko taua wa, he wa nui ki a taua ki te iwi Maori. I tenei wa kaore nga kura e whai ana i te taumata o te matauranga anake, engari, kei te whakamama i nga ahuatanga mo te whakaako i nga mahi a ringa, ara ko te mea nui rawa tenei, ko te whakanui i te ahuatanga o te tamariki Maori. Na nga ahuatanga hou nei i piki ai te matauranga i waenganui i a taua i nga tau tekau ma rima kua pahure ake nei, engari, e ai ra ki nga korero whakaatu, a ki te mohio tonu hoki, he maha tonu nga tamariki Maori kaore ano kia eke ki te matauranga e tika ana mo ratou. I penei ai pea, na te kore moni, ina hoki he taumaha ke ake nga raruraru kura ki nga matua Maori tena ki nga matua Pakeha. Etahi putake ano hoki pea, na te mea he tawhitiwhiti no nga kainga i nga kura nunui, he iti no nga moni kuhu mai ki te whanau a he nui hoki no te tamariki. E awhina ana te Kawanatanga i nga tamariki e whai ana i te taumata o te matauranga, engari he maha tonu nga tamariki penei e whakarerea ana ki muri. He mahi ta nga matua ki te whakatikatika i nga tamariki. Kei te awhina te Kawanatanga i nga komiti hapu e hiahia ana ki te awhina i nga tamariki. Ta ratou awhina he moni awhina. Kaore ano kia tatu noa tenei ahuatanga, engari ma te mahi tahi o te Kawanatanga me te iwi ki te awhina i nga komiti whaiti me nga komiti whanui ranei, e tatu tika ai a e kaha ai ki te kakari i tenei mea nui. Tetahi mea ano hei tirotiro, ko te mau o a tatou mahi Maori i nga tamariki. Mehemea he whakanui i te ahuatanga o te tamariki Maori, e tika ana ano me whakanui ano hoki nga tikanga Maori. I nga mahi i waenganui i nga pakeke, i kitea kaore e tika te takahi i enei mahi. Hari ana te ngakau ki te mahi a te Ropu Kura Maori ki te hohou ki roto i nga mahi kura, nga mahi a taua a te Maori. Koia nei te kaupapa o te pukapuka nei, ara ki te awhina i nga tamariki Maori ki nga taonga e tika ana, i te reo Pakeha, i te reo Maori ranei hei tirotiro ma ratou.

Reidrubber MOTOR TYRES AND TUBES available from your dealer Every inch of this wider “Road Level” tread shores the load—giving slow, even wear that ensures long mileage, safety and quiet running.