More Messages From Children Na nga tamariki o nga kura o Waiomatatini, o Te Whaiti enei korero. I hopukia a ratou korero i runga i te mihini e huaina nei he tape-recorder. Naku i tuhituhi, i whakatikatika, i tuku atu ki Te Ao Hou, kia kite ai nga tamariki o te motu i enei mahi a nga tamariki o Te Tairawhiti, o Tuhoe hoki. —Bruce Biggs. I teneki ata kai te korero atu ahau ki a koutou mo taku haerenga ki te tiki rōpere i Umurakau. (He puke tenei kei Te Whaiti.) I ahau e haere ki Umurakau i kite au i a Pita e hara mai ana i runga i te hiwi. Ka karanga mai a Pita i kī tana kapu i te rōpere. Karanga maia a Pita i hinga a Henare, ka maringi āna rōpere i roto i tana kapu. Karanga mai a Kohine me hoki ano matou ki Umurakau ki te kohi ano i etahi o nga ropere. Karanga mai ia, “Kia kī tonu ta korua kapu hoki mai ki te kāinga.” I kī haere te kapu ka hoki mātau ki te kāinga. Ka karanga mai a Peho me tiki atu te miraka i roto i te kapata kia pai hoki te reka o nga rōpere. —Whaitiri Iraia, Std. 2, Te Whaiti. I te ata nei, makariri nei, ka haere ahau ki te moana. Ka tae atu ki reira ka kohikohingia e au nga pupu. Ka kī taku kete ka haere ahau ki te tahu i te ahi mo taku tina. Ka tahu te ahi ka utua te tikera ki te wai. Ka paera te tikera ka mahingia e ahau he ti moku. Ka tina ahau. Mutu taku kai ka hoki ahau ke te kāinga. Ka hoatu e ahau te kete pupu ki taku mama. Ka mauria e ia ki ro whare ka kohuangia nga pupu mo te tina. Ka ki mai ia kia haere ahau ki te tiki kānga. Ka haere ahau, ka kite ahau i etahi tamariki e kaukau ana. Ka haere au ki te whawhati i etahi kānga. Ka mutu taku korero. —Mac Reid, Form I. Waiomatatini. I te hatarei ka haere maua tahi ko taku hoa ki te mahi pupu i te one. I purua o maua kete me ta maua hopeke ki runga i te hoiho. I te taima i a maua e haere ana i kī atu ahau ki taku hoa kauaka e whakapureitia tona hoiho kei taka ai. Kaore a ia i whakarongo mai ki a au. Ka tae maua ki te wāhi kohikohi pupu ka heke ahau i raro o taku hoiho ka haere taku hoa ki te here i o maua hoiho. Ka hoki mai taku hoa ka haere tonu atu maua tahi ki te kohikohi pupu. Ka kī atu au ki taku hoa, ona pupu he torutoru noa iho. Ka kī mai ia ki a au, “A, he whakahihi nou.” Ka kī atu ahau ki a ia, a, he whakahihi tonu a ia. Ka mina whawhai maua. Ka kī atu au ki a ia, kauaka maua e whawhai, ka patua maua e to maua mama. Ka kohikohi haere maua tahi a ka ki taku kete, ka hoki au ki te wāhi kei reira o maua hoiho. I kī atu au ki taku hoa, “E hoki ana ahau ki te kāinga.” Hoki mai ana maua tahi ki te kāinga. ka taka taku hoa, ka mate tona waewae. I kī atu ahau ki a ia, kaitoa, nona tou te hē, kaore e whakarongo ki te mea pakeke e kī atu. Ka kī mai ia ki a au, ae, he whakatoi noa. Haere ana maua tahi i te one, a ka tae ki te kāinga. Te taetanga ki te kāinga ka kohua nga pupu e to maua mama. A, kāti noa mo tenei ahiahi. —Kitty Mili, Form 2, Waiomatatini.