TE AO HOU i taia e te tari maori ma te poari mo nga mea maori

HE KAUPAPA KORERO Ka nui ra te manakitia o te putanga tuatahi o Te Ao Hou. Ko etahi ano i amuamu mo nga tuhapa o te pepa nei, otira he whakatupato enei ki te Etita. Ko nga mea hou o te putanga tuarua o Te Ao Hou he wahanga motuhake ma nga Wahine. Ehara i te mahi hanga noa iho te timata i tetahi ahuatanga hou mo ta tatou pepa. Hei te pepa mo te wa o Te Kirihimete e puta ai te nuinga a nga ahautanga hou tera e raroto ki te tokomaha o nga kaikorero o Te Ao Hou. Kei te takahia nga marae o te Motu e Te Etita ki te kohi haere i a koutou korero na reira kaua e amuamu mo te kore e rato nga korero e taia ki nga marae katoa, taria te roanga o te wa. Kei te taoro te haere mai a te korero hei taanga ki Te Ao Hou, engari kaore he korero mo nga mahi ahuareka mo nga marena, mo nga kanikani me era tu mahi. Me tuku mai ano enei tu korero me nga ahua hoki, tera e manaaki nuitia e te tangata. He nui tonu nga haruru o Te Ao Maori i roto o enei marama, otiia ko te mea tino nui rawa ko te hui hurahanga o nga Pohatu whakamauma-harantanga ki a Ta Apirana Ngata, hoki ana nga whakaaro ki te hunga kua mene kei te po. Kei te hau mai nga rongo mo nga mahi a te rangatahi i Akarana, na nga wahine o Te Ropu Wahine Maori Toko i Te Ora ko te whakarapopototanga i nga ripoata mo nga whare me te ahua o te noho a te tini o te Maori e noho mai nei i Akarana. Ma wai e tohu ka pehea ra te mutunga o taua ripoata? Ahakoa peheatia ta ratou ripoata ko te wairua o te rangatahi e hautu mai nei i Akarana e kore e haumaruru. Aroha ana te whakaaro iho mo te hunga e noho kore whare mai nei i Akarana, te hunga na te whai kia whiwhi oranga nana i kawe mai ki te taone mahi ai. He taitamariki te nuinga o taua iwi a hemanawa ana nga whakaaro me pehea ra me pehea ra. Ka nui te oho o te Maori ki te whai i nga taonga a o ratou tipuna. Na tetahi nupepa ara na te New Zealand Herald te korero inatata nei kei te ara mai ano te Reo Maori. E tika ana pea tenei inahoki kaingakau ana te whakamihi a te tangata ki nga wahanga reo Maori o Te Ao Hou. Kei te nekehia ake nga wahanga Maori o ta tatou pepa. Kei te whakaete mai hoki nga pukapuka huhua reo Maori kei te nui haere te whakaakona o te reo Maori me te kaingakau o te hunga taitamariki ki te whai kia mohio ratou ki te korero Maori.