TE AO HOU I TAIA E TE TARI MAORI MA TE POARI MO NGA MEA MAORI Ko Te Ao Hou he pukapuka ma te iwi Maori. KO te tumanako kia raroto hoki tenei pukapuka ki te Pakeha, a tera pea e kitea e ratou etahi mea hei whakamahorahora i o ratou whakaaro ki nga tikanga Maori, otira e kiia ake ra ko te kaupapa nui o tenei pukapuka hei kawe korero ki nga kainga Maori ki te iwi Maori. Ano te ahua o tenei pukapuka he ‘Marae’ hei whakawhaititanga i nga whakaaro Maori. Otira i te mea tera e paku noa te Pukapuka nei kaore e taea te panui nga take pakupaku me waiho ko nga take whanui mo tenei wa. Mo te putanga tuatahi o te pukapuka nei na te Etita te nuinga o nga korero i whakawhaiti, engari mo nga putanga e tu mai nei ko te tumanako kia riro te nuinga o nga korero ma te hunga rawaho e tuhi otira ma nga Maori. Kaore he whakahe mehemea ka haere mokamoka noa mai aua korero hei te Tari whakatikatika ai. Ka utua nga Kaituhi o nga korero e taia. I roto o enei tau tata ka nui te rongo o nga mahi a nga ropu a nga iwi ki te whakaohooho i nga mahi Maori a ma enei mahi e ora tonu ai e kaha ai te tipu a te Maori i roto i te ao Pakeha. He tika ra me mahi te Maori penei ano me te Pakeha kia ora ai; engari he mea pai tonu te mahi i nga mahi haka, i nga mahi whakairo i nga wa watea hei whakataruna a hei whakaahuru i to te Maori i tona kawa. Ka manaakitia enei mahi a te Maori e Te Ao Hou, a i nga wa ka taea mana e whakamarama nga mahi a Te Kawanatanga mo te iwi Maori. Na Te Tahua Moni Mo Nga Take Maori i punga a Te Ao Hou a tena te wa ka whai huruhuru mona ake. Ko te inoi atu ki a koutou kia manaakitia mai ta tatou taonga. Kei te wharangi 2 nga whakamarama me tuku mai ki te Etita, Box 2390, Poneke me tuku ranei ki te Tari Maori e tata ana ki tou kainga. Ma nga Poutapeta hoki e hoko a Te Ao Hou ki te tangata.

SUBSCRIBE TO TE AO HOU TE AO HOU IS YOUR OWN MAGAZINE Ta te rangatira tana kai he korero Te Ao Hou appears regularly four times a year. If we are to continue, we need your support. Your best support is a 10/- subscription, which does not need renewal until end 1954. Yearly subscriptions at 4/- are also sold. Fill in the form on pages 57 and 58