KO TE TAKE I HAERE AI TE RURU I TE PO Peneitia peratia ka noho nga manu ra, nga manu o te moana me nga manu o tuawhenua. I noho katoa ratou ki nga ngahere. Nawai ra a, ka timata nga manu o tuawhenua ki te amuamu kua nui rawa ratou ki nga ngahere, me whakawatea nga manu o te moana, tetahi he kaha rawa te turituri o nga karoro kaore e reka ta ratou moe i nga po. Kaore nga manu o te moana i aro mai ki aua amuamu, noho tonu ratou ki nga ngahere, na reira ka whakatika atu nga manu o tuawhenua ka whakatu pakanga ma ratou hei tute atu i era o ratou. Whakaae katoa nga manu o tuawhenua ae me pana e ratou aua manu, a tae noa ki te ruru te whakaaetanga he manu rere awatea hoki te ruru i taua wa. Otira i mua tata mai o te timatanga o taua whawhai ka whakaaro te ruru me haere ia ki te moe, oho rawa ake ia e kua mutu ke te whawhai a hinga ana ko nga manu o te moana. He whawhai roa taua whawhai engari i runga i te kaha toa o nga manu o tuawhenua aia atu ana nga manu o te moana ki waho o nga ngahere. I te rongonga o nga hoa o te ruru i te moe ke ia i a ratou e whawhai ra ka riri ratou ka kohetetia te ruru. Ka mate te ruru i te whakama na reira ka kore ia e haere noa i te awatea hei nga po anake kei kitea ia e ona hoa manu. A tae noa mai ki tenei ra ki te kitea te ruru e ona hoa manu e moe noa ana ka riri ratou a ka rere a ratou korero tawai mo tona moenga i te pakanga nui ki nga manu o te moana.