Kei tera putanga o Te Ao Hou etahi pakiwaitara ma nga tamariki, a anei ano etahi. Kia ora koutou nga tamariki o Waiomatatini a mehemea he korero a nga tamariki o etahi atu wahi me tuhi mai. KO TE MAHI KAI MOANA By Rangi Taukamo, F. III. Tikitiki M.D.H.S. (age 15 years) Na nga tamaraiki kura o Waiomatatini enei reta i tuhi atu ki a Te Etita mo o ratou haerenga ki tatahi, he mahi kai moana i reira. Ko Waiomatatini te kainga tuturu o Ta Apirana Ngata, he kainga tino mohiotia e nga iwi o te motu. Naku i whakatikatika etahi wahi o nga reta nei kei raru nga tamariki o etahi atu iwi i te reo o nga tamariki o Ngatiporou. —Bruce Biggs. E Koro, Tena koe e noho mai na i Poneke. He tuhituhi noa iho tenei ki a koe mo taku mahi i te moana i te ata o te Hatarei. I haere matau ki te mangoingoi ika. Ka tae atu matau kaore ano te tai kia timu. Ka ki mai taku papa kia haere ahau ki te rapa papaka i raro i nga pohatu kaita i ro wai. Tekau ma rua aku papaka hei mounu mo runga i te raina hopu ika. Timu ana te tai ka heke ahau me taku hoa ki te kohikohi pupu me etahi ngakihi. Ka ki a maua kete ka haere maua ki o matou hoiho ka hoki mai ki te kainga. Na Warihi Mirina. E Koro, Tena koe. E tono atu ana ahau i taku reta ki a koe. No te Ratapu ka ki mai taku papa kia haere ahau ki te moana ki te tiki papaka. No to maua taetanga ki te moana ka heke ahau ki raro i taku hoiho. Ka haere taku papa ki te whakaka i to maua ahi. Ka haere ahau ki runga i nga toka ki te rapa papaka. No te kitanga o ta maua peke ka hoki maua ki tahaki ki te painaina i to maua ahi. Ka hoki maua ki te kainga. No to maua taenga atu ki te kainga ka haere ahau ki te horoi i oku waewae, ka haere ahau ki te moe. I te ata ka haere taku mama ki te tiki i nga papaka. Ka ki atu taku papa ki a ia kia horoitia nga papaka ka puru ki roto ki te pakete. Ka reri nga papaka ki te kai ka whakapaitia e taku mama te tepu, ka kai matau. Ka ki mai taku papa ki ahau ki te kore e pau nga papaka me waiho mo te tina. Na to hoa aroha, Na Josephine Atkins. E koro, Tena koe. Kai te pehea koe? I te Ratapu nei ka haere ahau me taku tuakana ki te mahi kai moana i Te Awanui. Torutoru noa iho a maua kai moana. Tae mai maua ki etahi o nga toka ka kite ahau i tetahi tima e haere ana i runga i te moana. Hoki ana maua ki te tina ka kite taku tuakana i tetahi aho e takoto ana i runga rakau, ka tikingia e ahau. I korero mai taku hoa kia purua e ahau he paua ki runga i nga pihuka. Ka mutu taku mahi ka kuru-ngia e ahau te aho ki roto i te wai. Roa haere a ka ngau te ika. Ka kumea e ahau te aho ka mau he mango, ka mauria e maua ki tahaki, katahi noa maua ka tina. He korero pakupaku noa iho tenei ki a koe na to hoa aroha, Na Pae o te Riri Hori. E Koro, Tena koe e noho mai na. He korero paku noa iho tenei ki a koe, he korero mo ta matau haeretanga ki Tokomaru ki te mahi kai moana. No te taima haere matau ka haere mai te taraka ki te tiki mai i a matau. No to matau taenga atu ki Tokomaru ka hekeheke matau i raro i te taraka, ka haere matau ki nga toka. Tae atu matau ki reira he mahi kina etahi, he mahi kuku me te paua etahi. Ka ki nga peke ki te kai moana ka tina matau i tahaki, ka mutu ta matau tina ka piki matau i runga i te taraka ka hoki mai matau ki te kainga. Na Tame Kaua.