Taku Haere Ki Japan na Kingi Ihaka No te paunga o nga rā o te tau 1973, ka tae mai te tono mai ki ahau a te Japan Foundation kia haere atu ahau ki Japan i mua atu i te paunga o nga rā o Maehe 1974, ki te mātakitaki i te āhua noho o nga tāngata o taua whenua. Ko te hiahia o taua Foundation kia toru wiki ahau ki Japan, mā rātou e utu taku haerenga atu me taku hokinga mai, tae atu ki taku noho i reira, me aku kōpikopikotanga i reira. No te 8 o nga rā o Maehe ka rere atu ahau i Akarana ki Poihakena. E tata ana ki te waenganui pō o taua rā ano, ka rere atu i Poihakena ki Japan. E iwa haora e rere atu ana i Poihakena, ka tau atu ki te taunga manurere nui o Japan, ko tōna ingoa ko Haneda Airport. Atu i Poihakena ki Japan, tata kore ana ahau e moe ahakoa taku ngenge. Ko taku mate nui, he mataku i te āwhā. Ka kake, ka heke, ka kake, ka heke te manurere nei i te kino o te āwhā, engari, tae pai atu ana mātou ki Japan. No te atatū, i te ono i te ata, e pouri tonu ana i te mea he hōtoke ki Japan, ka tau atu te manurere. I tera taima o te tau, ka nui te tino kōpeke (makariri) o tera whenua, na i tō mātou taunga atu, e whā degrees (4 degrees) te makariri o taua wāhi. I reira hei tūtaki mai i ahau ko tetahi o nga tāngata o te Japan Foundation me tetahi o nga hekeretari o te Embassy o Niu Tireni i Tokyo. Ko te hekeretari nei, he Pākehā no Poneke, kua pau kē te rua tau ki reira, a kua mohio ki te reo o nga Hapanihi. Kahore i roa i te Airport, ka mauria ahau ki taku hōtera i roto ake i te taone nui, ara i Tokyo. Ko Tokyo, e tata ana ki te 12 mirione nga tāngata kei reira e noho ana. Ko te mea i tino mataku ai ahau, ko nga motokā; ko te tini ai, me te horo ki te haere, me te mātotoru o te haere o nga motokā, ano nei ki au, e tata pā atu ana tetahi motokā ki tetahi. Ko nga rori o taua taone, kī tonu i te motokā i nga taima katoa. Ko te hōtera i haere atu nei ahau, horekau i nuku atu i te tekau maero te tawhiti atu i te Airport, engari i te kaha tini o te motokā, nuku atu i te haora, katahi ano mātou ka tae. Ko te hōtera i reira nei ahau e noho ana, e toru mano nga ruuma moe, engari ko nga ruuma, tino kino te nohinohi (iti). I pēnei ai, he nohinohi ano no te nuinga o nga tāngata o taua whenua. Ko nga moenga, nga taonga katoa o ia ruuma o te hōtera, he nohinohi. Ko te mea i kata ai ahau, ko te taapu kaukau, Ko te waihanga, i rite ki te kāwhena te āhua, engari mo nga tāngata nohinohi anake. E toru putu nuku atu te hohonu; ko te whānui, e rua ano putu. Ko te take i pēnei ai nga taapu kaukau o reira no te mea, horekau te Hapanihi e kaukau penei ana i a tātou nei. Ka haere te Hapanihi ki te kaukau, ka timata atu ia i waho o te taapu. Ka timata atu tana horoi i a ia e noho ana i runga i te tuuru, e tū ana ranei. Ka mutu tana hopihopi i a ia i waho o te taapu, ka horoinia atu e ia nga hopi, katahi ano ka tomo atu ki roto i te taapu, ehara i te mea ki te horoi i a ia, engari ki reira okioki ai. E tata ana ki te haawhe haora a ia e noho ana i roto i te taapu wai, āhua wera, katahi ano ka puta mai. Ko nga whare paku, i rerekē noa atu i o tātou. He tini nga whare paku o reira horekau e wehe ana mo te tāne mo te wahine, ara, kotahi ano te whare paku mo nga wahine me nga tane. Na reira, kia tūpato te haere a te tangata kei rokohanga atu e whakakākahu ana te tangata i a ia. Tuarua ko nga wāhi mo te tiko, kahore he tuuru; hāngai tonu nga wāhi tiko ki raro i te papa (floor) o te whare. Horekau ahau i taunga ki tenei tikanga, ka hoki mai ahau. E kore e taea te korero whānui nga āhuatanga i kite ahau i reira; heio ano me whakarāpopoto ake nga korero ki nga mea whakamīharo i kite ahau. Ko etahi o nga tikanga a tērā iwi, i āhua rite ki nga tikanga a te Maori. Ko etahi o nga kāinga, kahore e whakaaengia kia mau hū (shoes) te tangata. Ka tae atu koe ki waho, me ata unuunu nga hū, katahi ano
ka āhei te tomo atu. Ko te nuinga ō ō rātou whare, he mea whāriki ki nga whāriki mātotoru, na rātou ano i raranga, ara, he mea raranga-ā-ringaringa, horekau i mahia e nga mihiini. E rua, e toru inihi ranei te mātotoru o nga whāriki nei. E toru aku haerenga ki nga karakia Mihinare i reira, engari ko nga minita he Hapanihi a ko te reo, he Hapanihi ano. I taku taenga atu i taku haeranga tuatahi, i waho ano o te whare karakia, ka kite ahau i nga hū e tākotokoto ana i waho. Mahara pai ahau ki etahi ō ō tātau marae ki te haere ana ki nga tangihanga. Ka tangotango ahau i aku hū, ka tomo atu. Mai i te tīmatanga tae noa ki te mutunga, kotahi ano reo o te karakia, ko tō rātou ake reo. Whakamīharo atu ahau i te tapu o te karakia. Ka mutu mai te karakia, ka tūtaki ahau ki te minita, katahi ano ka karangatia te whakaminenga kia hoki ano ki roto i te whare Karakia. Ka karanga mai te Minita ki au kia korero ahau ki te whakaminenga, na tetahi ō rātou i whaka-hapanihi aku korero. Muri tata mai, ka putaputa mai mātou ki waho, e taka ana he kai me nga tāngata. Ko nga kai, he raihi he miiti, he paraoa, he tī. Na ko ēnei tikanga, ara, te whāngai i te tangata ki te kai i muri mai i te karakia, i pēnei ano i a mātou e noho nei i te Mihana Maori o Akarana. Pera ai hoki tā mātou ture i nga Ratapu katoa — ka mutu te karakia, ko te kai. Ko nga kai a tērā iwi, e kore te Maori e ora. Ko etahi o ā rātou tino kai, he pāua, he kina, he ika, he tuna. Reka kē ki a rātou te kai i nga kai-moana me kai mata. Ahakoa nga ika, e kai matangia ana. Ehara rātou i te iwi kai miiti. I mua hoki, kahore tō rātou whakapono e whakaae kia kai rātou i nga kararehe e whā nga waewae. He tino kai nā rätou te heihei me nga kai moana katoa. Ko Buddha me Shinto nga haahi nui o tera iwi. Kei raro ake i te kotahi paiheneti nga karaitiana o tērā ake iwi. I haere ahau ki te kite i ō rātou temepara, ara o nga haahi o Buddha me Shinto. Ko te nuinga o nga temepara nei, nui noa atu i te taone hooro o Akarana. He whakapakoko te nuinga o nga taonga o roto. Kei muri i te aata nui, ko te whakapakoko o Buddha, e rima tekau putu nuku atu te teitei, tekau ma rua putu nuku atu te whānui. Kei nga taha o Buddha, he kānara, kei mua mai, he kāpura (ahi), na, kei tetahi taha he wāhi pēnei i te taapu nei, hei takotonga mo nga koha a nga tāngata i haere atu ana ki reira karakia ai. He iwi mataku kehua tērā iwi. E kore e taea te whakamārama poto ki te reo Maori etahi o nga tikanga a enei haahi. He maha ō rātou tuāhu, he maha ō rātou atua. Ko etahi e whakapono ana ki nga rākau, ko etahi ki nga kōwhatu, me nga mea tinitini noa. He iwi whakataputapu; he iwi tūpato; he iwi whakapono ki ō rātou ake atua. Ka puta mai nga tāngata i nga temepara, ka haere ki te uhiuhi i a rātou ki te wai makariri (penei ano i etahi ō tātou o te iwi Maori), ki te paoa (auahi) ranei. He rite katoa nga rā ki a rātou; kahore i penei i a tātou nei, otira i etahi o tātou, hei nga Ratapu anake ka haere ki te karakia. Ko to rātou rā nui mo te haere ki te karakia he Harerei, engari i nga rā katoa, e hia rau tāngata e haere ana ki nga temepara, ki nga tuāhu. I tae au i tetahi rā ki tetahi temepara nui i Tokyo. I taku taenga atu, e tū ana i waho i te temepara tetahi teneti nui, ki ana i te putiputi mā. I roto i te temepara nei, he putiputi mā kei nga wāhi katoa—atu i te kūwaha, tae noa ki te aata. No taku pātainga atu ki nga tāngata i reira, ka kōrerotia mai ki ahau e kore e roa ka whakahaeretia he karakia nehu tūpapaku. Nōku i taua temepara, ka patapataingia atu e ahau, ā rātou tikanga mo ō rātou tūpapaku. He maha ā rātou tikanga i rite ki a tātou. I te wā e mate ai he tangata, ka horoia ki te wai wera. Muri mai, katahi ka whakakākahungia ki te kākahu mā. E rua rā te tupapaku e takoto ana i te kāinga, katahi ka mauria ki te temepara ki te tuāhu rānei. E tangihanga ana rātou i roto ake i ō rātou whare. Ko te teneti nui e tū ra i mua o te temepara, kei roto nga pukapuka hei tuhinga mo nga tāngata katoa e haere ana ki te karakia nehu, i ō rātou ingoa. E tahungia ana nga tūpapaku katoa, ahakoa ko wai. Ka mutu te karakia i te temepara, ka haere te nuinga o te whakaminenga ki te kāinga o te tūpapaku ki te takahi i te whare ki te mau taonga hoki ma te kiri-mate. Ko nga tāngata katoa e tae ki te tangihanga, ka Continued on page 21
Permanent link to this item
https://paperspast.natlib.govt.nz/periodicals/TAH197506.2.2
Bibliographic details
Te Ao Hou, June 1975, Page 2
Word Count
1,743Taku Haere Ki Japan Te Ao Hou, June 1975, Page 2
Using This Item
E here ana ngā mōhiotanga i tēnei whakaputanga i raro i te manatārua o te Karauna, i te manatārua o te Māori Purposes Fund Board hoki/rānei. Kua whakaae te Māori Purposes Fund Board i tōna whakaaetanga ki te National Library of New Zealand Te Puna Mātauranga o Aotearoa kia whakawhanake kia whakatupu hoki ā-ipurangi i tēnei ihirangi.
Ka taea e koe te rapu, te tirotiro, te tā, te tiki ā-ipurangi hoki i ngā kai o roto mō te rangahau, me ngā whakamātau whaiaro a te tangata. Me mātua kimi whakaaetanga mai i te poari mō ētahi atu whakamahinga.
He pai noa iho tō hanga hononga ki ngā kai o roto i tēnei pae tukutuku. Kāore e whakaaetia ngā hononga kia kī, kia whakaatu whakaaro rānei ehara ngā kai nei nā te National Library.
The Secretary Maori Purposes Fund Board
C/- Te Puni Kokiri
PO Box 3943
WELLINGTON
Waea: (04) 922 6000
Īmēra: MB-RPO-MPF@tpk.govt.nz
Information in this publication is subject to Crown copyright and/or the copyright of the Māori Purposes Fund Board. The Māori Purposes Fund Board has granted permission to the National Library of New Zealand Te Puna Mātauranga o Aotearoa to develop and maintain this content online.
You can search, browse, print and download for research and personal study. Permission must be obtained from the board for any other use.
You are welcome to create links to the content on this website. Any link may not be done in a way to say or imply that the material is other than that of the National Library.
The Secretary Maori Purposes Fund Board
C/- Te Puni Kokiri
PO Box 3943
WELLINGTON
Phone: (04) 922 6000
Email: MB-RPO-MPF@tpk.govt.nz