KO TE MAORI KEI AKARANA

Te Ao Hou, June 1959, Page 3

KO TE MAORI KEI AKARANA Ko te nuinga o nga korero o tenei putanga o Te Ao Hou mo te Maori kei Akarana. He hanga parekareka te matakitaki iho ki aua iwi o Akarana. Kei reira katoa nga iwi o te motu, nga hahi katoa o te motu a nga momo tangata katoa, te tangata whai rawa, te tangata rawakore, te tangata taitara matauranga ona, te tangata noa, aha ake aha ake. Ko etahi Maori kua reka ake a Akarana i te kainga, a ko etahi ano kei te tangi, e te kainga e! Ko te nuinga ra o te hunga i heke ki Akarana kua pai te noho, kua neke ke atu te pai i te noho atu i te kainga. Ahakoa ra pai te noho he wa ano ka koroingo nga whakaaro ki te kainga, a ko nga mea takitahi e hoki ana oti atu. Na te kore mahi totika o nga wa kainga te nuinga i a ki te taone noho ai. Ka tae te tauhou ki te taone e kore e roa kua matatau ki te pakeha, kua reka te noho. Ahakoa pai te noho tahi a te Pakeha raua ko te Maori, ka koroingo ano te Maori ki te Maori, a kei te tipu tana hia nei ropu Maori motuhake ki Akarana. He mea pai tonu tenei he ropu enei hei tuhonohono i taua hunga e noho ra i Akarana. E reka ai te noho ki te taone me whai mahi me whai kainga te tangata. Ka nui te mahi ma te Maori kei Akarana, a kua whiwhi etahi ki nga mahi totika tonu. Ko te mea e whaia nuitia ana ko te whai kia ako te Maori ki nga mahi tohunga penei me nga mahi kamura nei, koia ra hoki nga mahi pumau e puta nui ai te oranga. Ko te whai whare te mea uaua mo tana hia rau e whakaeke ana ia tau ia tau ki Akarana. Ko etahi ano haere ai ki nga mahi tuawhenua kia whai punga ra mo te whare ka haere ki Akarana. Ko te tokomaha ia e whakaeke ana kaore he aroarowhenua kei whea he whare a ko nga whare e whiwhi he whare kanukanu, a ko nga mea ranei he nui te moni reti. He tika tonu kei te Kawanatanga tetahi awhina engari e kore e ngata wawe te hiahia o te takimano kei te aue whare mo ratou. Otira me matakitaki ki nga korero mo te Maori kei Akarana. He nui nga tuhituhinga he Maori ano nga kaituhi, na nga Maori tupakeke na nga Maori o te rangatahi kei nga whare Wananga. He oranga ngakau te kite iho ka nui te pakari o nga whakaaro o nga kaihautu o Akarana. Ko nga mahi kei te mahia he mahi tika, he mahi tera e whai hua mo te iwi nui tonu. Ko te tumanako kia ata korerotia enei korero hei putake korero hei kaupapa mahi.