Te Pua a Hinemahanga

Te Ao Hou, April 1956, Page 45

Te Pua a Hinemahanga Na, ko Hine-Mahanga ko te wahine tenei nana i taki te manu, e karangatia ana tona whakatauki: “Ko te pua a Hine-mahanga.” Ko te take i takina ai e ia te manu he tangihanga no tana mokopuna ki te manu a tetahi tamaiti, katahi ka takina e ia te manu. Ko te manu tuatahi nana i noho tuatahi te whare o Hine-mahanga he kopara, no muri manu katoa. Nui atu te manu e haere ana ki tenei pua taki, kaore nga manu katoa e wareware ki te pukepuke i tu ai te whare o Hine-mahanga tae noa mai ki tenei whakatupurange. Kaore hoki nga manu e wareware ki te wai i tukua ai nga kaha a Hine-mahanga; kaore hoki nga manu e wareware ki nga rakau i whakaritea e Hine-mahanga hei nohoanga mo nga manu. He pono enei korero, i kite ano matou, a i matakitaki ano ki te mahi, ki te mana o Hine-mahanga i te takiwa i takina ai e ia te manu. Tahuri tonu ki te tohu, hoki rawa mai tana tane, a Patea, kua tu te whare hinu a tana wahine; ka mate tana tane i te whakama, kaore hoki ana hinu; patua iho tana i wahine, a Hine-mahanga, ka mate. Me he mea kaore a Hine-mahanga i patua e tana tane penei kua takina ano te pakake ki Manawarakau; ka oti nga pou mo tona kupenga, ka patua nei e tana tane, kore tonu atu e oti te mahi mo te pakake e u ai ki uta. Na Hori Ropiha o Waipawa i korero tenei korero ki a Te Peehi a i tuhia ki tana pukapuka ki “Forest Lore of the Maori”. Tera tetahi whakatauaki o mua e ki penei ana “Ko te pua a Hinemahanga” engari he aha ra tona tikanga kaore te tangata o tenei ra e mohio.