Miria Simpson (1922 – 2002)

Muka, Volume 14, Issue 4, 1 July 2002, Page 1

Miria Simpson (1922 - 2002)

Nā Timoti Karetu

E kui Miria, matawaia ana ra a kamo i te hokinga o mahara ki nga wa o te noho tahitanga, o te kata tahitanga, o te tautohe tahitanga - ka mutu he nui tonu nga wa pera engari i te taunga ano o te puehu, tau ana ano hoki ko mauri.

1957 te tau i tutaki tuatahi ai taua. Ko taua tau ra hoki toku na tau tuatahi i te Whare Wananga o Wikitoria, a, ko tou na tau tuatahi ano hoki ki reira mahi ai. Kei noho te akonga Maori ka hipa i te kuaha o to tari pake mai ana tera to waha me te aha, ko te ingoa karangaranga mou i waenga i a matou, i nga akonga, ko 'The Voice'. He aha ai? He rangona no to reo i tawhiti ra ano e puhohe ana, e tioro ana, e tata ana, engari e tata ana na runga i te aroha.

Na wai ra haere ana koe i au na haere ko au hoki ki aku, a, mea rawa ake ka tutaki ano taua i Ranana, i Ingarangi, i te Whare Wananga o Waikato, a, oti atu ana ki Te Taura Whiri i te Reo

Maori. I a au ka wehe mai i reira ka noho atu ko koe hei kanohi pakeke mo te Poari hou, a hinga nei koe.

Otira, ko te taura paihere i a taua ko te reo, a, whawhai tahi ana taua kia tika, kia eke. Ahakoa te kore i aro mai o te ao Maori whanui, ko taua ena e whakamomori ra, e nonoke ra mei kore noa e tupono ka areare mai nga taringa o te ao Maori.

Kati, ko koe tena kua tau atu kite ngeangea, kite makiu ite nguenguetanga o te tangata. Tera pea kua kore i nguengue i naianei i te mea ko koe kua tae atu kite whakaohooho mai ano i a ratou!

Waiho mai ko au ki muri nei ki ta taua taonga i te taha o te rangatahi whakaaro nui kite ora, kite mau oto taua reo haere ake nei.

Moe mai ra i te moenga ka moea nei e tatou katoa a tona wa. Ko au ohaki ka mau tonu i a koe i ki ra 'Ara nga whetu e kapokapo mai ra, kapohia atu kei whakawhenua noa'. Kia tikina atu i te waiata a Kohine Ponika,

E te rangatahi maranga mai Nou te ao i tenei wa Etu

Koira katoa au na whakahau, au na whakamaherehere kite rangatahi Maori. Kei hea he whakamaumaharatanga ki a koe i tua atu mena kite tahuri mai te ao Maori?

Ko te po ra ki a koe, e kui e, ko te po ra ki a koe. Haere ra, haere atu ra.