Ko nga kupu enei a Mahuta ki a matou ko aku hoa o Te Kotahitanga i te taenga ki Waahi i te marama o Mei nei:— “Haere mai e taku papa (Te Heuheu Tukino) te pou hereanga o te tangata o te whenua o te tikanga. Haere mai whakawaha mai nga rangatira o te motu. Haere mai nga rangatira o te motu, i te ngaro hoki a ka kitea mai. Haere mai ki te mahi tahi, ki te whiriwhiri tahi. Haere mai e nga mahi matau ki te titiro i tenei hanga i te tikanga i te kupu. Haere mai e nga mahi matau ki te titiro whetu.” Katahi ka whakahua te waiata. Kei waenganui o Waikato me te pakeha e takoto ana ko te pakanga, ko te whakahekenga toto, ko te raupatu, he awa nui e hamama tonu ana ka toru tekau tenei nga tau. Kia roa e karapiti ai: engari tenei kei te whakatutata. Kua hopu a Mahuta ki te kupu a Potatau “Kia mau ki te ture”—kei te whaiwhai hoki i tera kupu na “Kia mau ki te whakapono,” e manaakitia ra a Nikora ma e noho mai ra i Te Pourewa, e whakatapua nei te Ratapu, e puare nei nga whare o Waikato ki nga kauwhau a nga minita. Na Mahuta te kupu ki te taina mo te kakahu kanukanu o o raua tipuna. Maku e tapiri atu tenei, kaore he mate e Waikato ki te kanihitia e koe nga pakaru o te kakahu na, hei whariki mou a ko ake nei. He tikanga toitu tenei kei te ao e takoto ana, na te ringa o te Atua i tuhi ki te rangi ki te whenua, ko te whakapono anake te kaupapa hei utanga mo nga mahi a te tangata e tu ai, e ora ai. Ehara te ture, ehara te ahuwhenua, ehara te uaua tangata, ehara te matauranga he tapiri kau no te whakapono, no te wehi ki te Atua. Te Kauhanganui Ka ara te pepeha kei Waikato te rakau e tupu ana ka toro te Kauhanganui hei taunga mo nga manu o te motu. Tera kei Maungakawa e toro ana, ko te wahi tera i te torona o te kingi, ko te huinga tera o te iwi i raro i tera whakahaere. Hei te 2 o nga ra o Mei i ia tau i ia tau ka tuwhera te Kauhanganui, ka hui nga Matariki, nga Manukura, nga Whakamarumaru, me tenei i te parangeeki nei. (Ko wai oti i rangatira ki te kore he huruhuru mo nga waewae?). Kei reira ka puaki te kupu i te kingi, ka whiriwhiria e nga rangatira nga take. I te wa e tu ke ana te kingi i nga mahi o te Paremete, i nga whakahaere hoki o era atu wahi o te motu, kaore au e marama he aha ranei nga tino take hei whiriwhiringa. Engari i nga tau i ara nei Te Kotahitanga ka tuatoru nei taenga ki te Kauhanganui; i te wa hoki o Mahuta nei i uru ai me Waikato katoa ki te whiriwhiri i nga ture e hangaia ana hai i te Paremete, ka nui nga take korero o nga hui a te Kauhanganui. Na e Waikato! he taonga nui tenei te ahu ki waho i ou rohe tirotiro ai whakarongorongo ai hoki: he taonga ano hoki te tuku atu i nga maramatanga o waho ki tou takiwa, kia marama ai to titiro ki roto ki waho, ki tetahi taha ki tetahi taha, kia ahei ai te whakariterite, a, te whakatikatika i nga tikanga me te whakahaerenga o nga kupu nunui kei to awa e takoto ana.