TE AO HOU Kei te nui ake te haere a te Maori ki era motu i tenei wa i nga wa o mua. I mua o te whawhai, he torutoru noa iho nga Maori i kite i era whenua engari inaianei, kaore e pera ana. Kei te rite te Maori ki te Pakeha i tenei wa, ara, ahakoa pehea to pokeke o te Maori, kei te hiahia ki te haere kia kite i te ao. I te huinga o nga minita Maori o nga hahi I Otira kotahi te kupu, ara, mehemea e hiahia ana tetahi minita ki te haere ki era motu kimi matauranga haeri ai, me tuku kia haere. Kua wehea tetahi wahi o te Moni a Nga Hoia Maori hei putea a ko nga moni, ka riro mai i te putea nei hei awhina i nga tamariki Maori e hiahia ana ki te whakapiki i o ratou matauranga Ko te tumanako ra tena pea ka haere etahi ki era motu kimi haere ai i te taumata o te matauranga. Te rahi o te putea nei he £10,000. He pai te kite iho kaore i te whaiti ki Oropi anake te whakamatatau a ngaitaua a te Maori e haere nei ki tawahi, engari kei te pa atu ano ki nga iwi o Ehia. Na te nohonga o nga ope hoia ki Tiapani a ki Korea hoki i matatau ai te Maori ki era iwi. Na te hui a nga wahine o te Ao ki Manira haere nei he mangai mo te Ropu Toko i Te Ora o Nga Wahin Maori (apiti atu ki te haere a te Ropu o Te Harawira ma) ka tutataki ngaitaua ki nga iwi whai whakaaro o era iwi. Na te ripoata a Mira Petricevich te hekeretari o Te Ropu Toko i te Ora o nga Wahine Maori, ko raua hoki ko Mrs H. D. Bennett ara ko Wiki Peneti i haere ki Manira, i ata whakamarama ta raua haere ki te tokomaha noa atu o nga wahine Maori a marakerake ana tera te kite atu i te whai taketanga o era tu hui. Na Wiki etahi kupu hei kinaki i ta raua ripoata. E kore nga tangata o Niu Tireni e whakaae he whanaunga tata ratou no nga iwi o Ehia, engari ia he mea pai tonu te whakawhanaunga i runga i nga mahi me nga whakaaro, ina te tauira e kopikopiko nei ngaitaua ki nga marae o era iwi. Ki a ngaitaua ki te Maori he mea nui kei tenei whakawhanaunga motemea ki nga korero no Ehia mai nga tipuna o te Maori. Ina nga iwi o Ehia e whai nei kia rite ta ratou na noho ki ta te Pakeha penei hoki i te iwi Maori. Ko tetahi korero nui o te haere a Mira Petricevich ko tenei na “Ka mutu te iwi waimarie i te Maori”. He mea pai, he korero pai tenei engari kaua e noho i runga o te noho nui tonu. Na te haere o nga kaihautu o nga waka o te Pakeha ki te matakitaki i nga ahuatanga o te ao i penei rawa ai pea te pai o te noho a nga iwi o Niu Tireni. Waihoki kua timata te haere whanui a te Maori.

KIA NGAHAU KI TO MAHI Chew WRIGLEY'S Spearmint Gum. Helps relieve monotony. Makes time pass pleasantly Enjoy it every day. Tino makona! Tino reka!