TE AO HOU

KO NGA KUPU A TE ETITA Ka waru tau inaianei te tuunga o nga komiti-a-Iwi, a ko te tumanako i taua wa katahi pea ka kitea he taanga manawa mo te iwi Maori. He nui nga mahi nunui kua oti i aua komiti-a-Iwi—ina nga marae maha noa atu o te motu ma reira hoki ka mau ai te Maoritanga nei. A ko etahi mahi a aua komiti he aruaru haere i nga mea e tapoko ana ki te he, penei i nga mea e riro nui ana i nga whakawainga a te waipiro. Otira he timatanga mahi noa enei, ma hea atu tatou i konei ki nga taumata o te tumanako toko i te ora me te pai mo te iwi Maori? Ma te aha e taea ai e aua Komiti te whakapiki nga mahi ahuwhenua, mahi whare me nga mahi e piki ai te matauranga o nga tamariki Maori. Kei te pai taria te roanga. Kua puta ake ano nga korero tera nga huarahi e taea ai e aua komiti te awhina nga mahi ahuwhenua. Ka taea te awhina nga mahi hanga whare ina ra ma aua komiti e tohutohu nga huarahi e whiwhi ai ki nga awhina moni a te Kawanatanga. Ka taea etahi awhina nunui mo te taha ki nga huarahi ki te matauranga haunga nga awhina mo nga tamariki. Kei Akarana a kei Poneke hoki nga ropu whakaakoako i nga pakeke a e tika ana kia manaakitia aua ropu e nga komiti-a-iwi me poroaki ona tohunga ki waenganui i nga iwi whakaakoako haere ai. Inatata nei ka whakapuakitia e te Minita Maori e Te Kopata tetahi tikanga hei awhina i nga whakaaro whai i nga matauranga o te Pakeha. Anei na tana korero, ki te kohia e nga komiti-a-iwi tetahi moni hei awhina i nga tamariki kei te noho he nga matua ki nga kura mana ma te Kawanatanga tetahi wahanga ara mana te moni tapiri. He whakaaro tika tenei kia ahua roaroa atu ano ai etahi o nga tamariki ki nga kura a kia whiwhi ai i nga hua o te matauranga. E kore e pera rawa atu te nui o te moni tapiri mo tenei tau engari kei whea mai. Ma konei pea e tutuki ai te kura a etahi o a ngaitaua tamariki. He oranga ngakau te kite iho ka nui te piki mai o nga mahi ahuwhenua o te Tairawhiti ina hoki kua tutu haere nga komiti hou hei whakahaere i etahi whenua nunui tonu. Otira ahakoa te ora o enei whenua e whaiti ana tenei hei oranga mo te hunga tokoiti. Ko te tokomaha me rapa he oranga ki nga mahi huhua a ma te whiwhi ki te matauranga e taputapu ai. Na reira tera e kitea e nga komiti-a-iwi he tino taonga ma ratou i roto i te whakaaro o te Minita Maori mo te moni tapiri hei awhina i nga huarahi mo te matauranga. Katahi pea ka tutuki nga wawata toko i te ora me te pai mo te iwi Maori.

Reidrubber MOTOR TYRES AND TUBES available from your dealer Every inch of this wider “Rood Level” tread shores the load—giving slow, even wear that ensures long mileage, safety and quiet running.