He Tau Whakaohooho

Te Ao Hou, December 1960, Page 2

He Tau Whakaohooho ka mutu te tino tau mo te iwi Maori ko te tau 1960. Ano he mea ohorere te puawaitanga mai o te whakaaro nui mo te iwi Maori. Tamatuatahi te puta nui o te korero i nga nupepe mo nga take Maori, mo nga taikahatanga mo nga uauatanga, mo nga painga mo nga pikanga a ko te mea nui ia ko te ngakau aroha o nga korero a aua nupepa. Timata tino mai te tau i nga korero a Te Ropu Tautoko i te take ma haere he Maori i roto i te tiima ki Awherika, a ahakoa kaore i haere he Maori, i mutu pai nga korero. I tau tonu ki ta Te Ropu Whakahaere Whutupaoro i mea ai kaua he Maori e haere ki Awherika ahakoa ra kaore taua whakataunga i taea te whakaueue, ko te hua nui o te tautohetohe ko tenei na he tokamaha te hunga kei Niu Tireni nei e kore o ratou ngakau e whakaae kia whakaparahakotia te iwi Maori he mea tino pai tenei. Kaore i kore atu na nga hui a Nga Kaiarahi o Te Rangatahi tetahi wahanga nui i penei rawa ai te aro mai o te motu ki nga take Maori. Mai i tera putanga o Te Ao Hou kua tu nga Hui a Te Rangatahi ki Whakatane, ki Turanga a ki Otautahi, a meake nei ka tu he hui ki Marton a ki Kaitaia. He orite tonu nga putaki korero mo aua hui, ko nga korero mo te piki o te tokomaha o te iwi Maori, no nga mahi e pumau ai te ora a tinana, mo te hanga whare, mo te whakanohonoho i nga taitamariki Maori ki nga kura mahi a ringa, mo te whakawhiwhi mahi. He nui nga korero i puta i aua hui mo aua putake korero. Na te puta nui o nga korero o nga hui nei i roto o nga nupepe ko mohio te Pakeha ko te iwi tokoiti nei ko te Maori kei te piki ki tetakimano ke te takitini a ki te penei tonu te kaha a te tipu pau rawa mai tenei rau tau kua ahua ritetonu te tokomaha o te Maori ki to te Pakeha. Kei te taia ki tenet putanga o Te Ao Hou nga korero a Takuta Rina Moore “Mo te Ora a Tinana o Te Iwi Maori” i panuitia ki te hui a Te Rangatahi i tu ki Otautahi i Akuhata. Ko nga mea i rongo i aua korero a Rina Moore a kore e wareware tata i a ratou te hohonu o ana korero te pai o te whakatakoto o te korero a te wairua aroha hoki ki te iwi. I roto i ana korero etahi korero mo nga whare mo te Maori, mo te piki o te tokomaha o te Maori menga korero hoki mo te hunga e taka ana ki te he he putake korero hei whiriwhiritanga me kore e kitea he maunga ringa. I puta hoki etahi korero a taua Takuta mo nga mahi hianga a nga taitamariki. Ka mutu pea i ana korero. Koa ana tera a Te Ao Hou ki te panui I tenei putanga ona i nga korero a Miss S. Ashton-Warner mo Takuta Maharaia Winiata. He kai tito purakau ara he wahine tuhi pukapuka a Miss Ashton-Warner nana te pukapuka ra a Spinster i tuhi a kei te mahia tana korero purakau hei pikitia. Ma koutou tonu e korero te tangi a tenei wahine.