O TE KIINGITANGA O WAIKATO

Te Ao Hou, July 1958, Page 4

O TE KIINGITANGA O WAIKATO Ka pau te rau tau tuatahi o Te Kiingitanga o Waikato, a kitea ana ka nui te kaha, ka nui te ora o tenei taonga. Ahakoa nga piki nga heke o roto i nga tau ko te wairua ia o te taonga nei kaore ona memehatanga. Titiro ki te hui whakanui o te rau tau i tu ra ki Ngaruawahia, ka mutu te tino hui. Otira ehara i te mea koia ra anake te hui whakanui a Waikato, ia tau ia tau e puta ana nga whakamoemiti a Tainui waka katoa ki to ratou Ariki tapairu ki a Koroki. He nui te piripono o nga iwi o te Kingi, e whakaputaina ana o ratou na aroha i a ratou Poukai, a i te maringi noa mai o nga awhina i nga hui o nga Oketopa, me era atu aroha nui noa atu ki ta ratou na taonga whakahirahira. Tera te tangata e patai he aha ra te Kiingitanga nei Mai rano ko ta te Kiingitanga he tuhonohono i te hunga kei raro i tona maru a kei te mau tonu tona wehi me tona ihi. I ona ra i tukua e nga iwi o ratou maramara whenua ki raro i te mana o te Kiingitanga hei huarahi arai i te hoko, a ahakoa kua kore he maharahara mo te hoko te katoa o nga marae o Tainui kua tukua ki a Koroki. Kotahi ano te ahuatanga hou o te Kiingitanga ko tona whanaungatanga ki te Pakeha. Ka puea ake a Waikato i nga whawhai ki te Pakeha i raupatutia ra ona whenua, he mea taraweti nana te Pakeha. Mai i te urunga o Mahuta ki te Whare Ariki o te Paremata ka ahua rata nga whakaaro o Waikato ki nga mahi a te Pakeha, a tae rawa mai ki a Te Puea kua mahorahora nga tamariki ki te haere ki nga kura. Kua whakaputaina hoki e te Kawanatanga te moni utu mo nga whenua raupatu o Waikato. Ko te Kiingitanga te punga o te Maoritanga o Waikato. Na te hui o te rau tau i tu ra ki Ngaruawahia i whakaatu kei te haere tahi te Maoritanga me nga ahuatanga o te ao hou, inahoki i reira nga mahi ngahau a te Rangatahi e manaakitia ana.