I WAIATA TARATARA AI TE POROKA

Te Ao Hou, April 1955, Page 52

I WAIATA TARATARA AI TE POROKA Na G. N. Lansdown I mua noa atu, kaore he parirau o te pekapeka, engari noho tahi ai penei me te poroka i roto awa, repo ranei. He hoa takatapui te poroka me te pekapeka, na kaukau tahi ai raua puta noa i nga wahi katoa. No tetahi rangi ka puku te rae o te pekapeka, katahi ka mea atu ki te poroka, ‘ki te noho tonu au i roto i tenei awa repo, tera pea ahau ka whara, ka mate ranei. Titiro hoki ki te hau tutu a te tamariki e pangapanga kohatu nunui nei ki roto i to taua wai kainga, me te kaukau, me te takatakahi haere. Kei tetahi rangi ki te kore au e tupato ka kopenutia ahau. Kaore ahau i te tahi me pirangi ki te noho tahi me nga ika weriweri nei,’ ano ra te auareatanga o tona waha. ‘Ka whakatipu parirau au moku, a ka whakahoahoa ki nga manu ataahua.’ ‘Aue, kaua ra e whakarere i ahau,’ te tangi atu a te poroka. ‘Ka tino mokemoke au ki te whakarere koe i au. Ko koe anake kei, “i au,” te awa nei hei korerotanga atu maku, no te mea, kia maumahara, kahore he arero o te ika kia korero ai ratou, na he waha-ngu katoa. Engari koa kua oti ke te whakaaro o te pekapeka, ka whakarerea e ia te awa. Muri nei kaore i roa, ka tipu ona parirau, na ka ngana na ki te whakapiri ki nga manu papai o te rangi. Engari ka mea atu ratou. ‘He kiore ke koe. I rite ou huruhuru ki o te kiore, kaore i penei me o matou. Matika atu, noho, tahi me te kiore.’ Ka whai na te pekapeka ki te pera, engari ka whaka hokia e te kiore. ‘Ehara koe i te kiore, engari he manu ke,’ na haere atu ana i tana haere. Katahi te pekapeka ka whawhai ki te maunu i ona parirau, ka hoki ai ki te noho tahi me te poroka i roto i te awa: kore ake nga parirau i makere atu. Koia na ka waiata taratara atu te poroka ki tona hoa ki te pekapeka kia hoki mai ano ki te awa he mokemoke nona, engari hoki ka noho ke atu te pekapeka he whakama nona ki te whaaki i tona whakahaweatanga e nga manu me nga kiore.