Na Eruera Nepia tenei korero he mea tango mai i te pukapuka a Kawana Kerei—Nga Mahi a Nga Tupuna. Ka kimi a Mani i ona matna Ko wai koutou kahore ano kia rongo ki nga kupu mo te tangata nei mo Maui? Nana nei hoki i here te ra, kia ata haere ai, ia ra, ia ra; nana ano hoki i huhuti ake te ika e kiia nei e tatou ko Te Ika A Maui; a, nana i whai ahi ai tatou, he mea tiki nana i tona tipuna, i a Mahuika, te ahi pumau mo ake tonu atu. Na, ko Maui te tamaiti whakamutunga a Makea Tutara raua ko tona hoa wahine ko Taranga. Tokorima ona tuakana, a, kotahi o ratou he wahine. I te whanautanga o Maui, kihai i pirangi tona whaea ki a ia. Te ahua nei i pohehe a Taranga i whanau mate mai tana tamaiti. Katahi ka whiua e ia tana potiki ki te moana. Engari ka pa te aroha ki te hunga o te moana, a hopukina ana e ratou ka paea e nga tai ki te one. I konei ka kitea e tona tipuna e Tama-nui-ki-te-rangi, ka haria e ia ki tona whare. Nana i whakatipu te tamaiti nei, a, nana hoki i ako ki te waiata, ki te haka, ki te whakapapa, me etahi atu akoranga. Ka pakeke haere a Maui, ka tae mai ki a ia te hiahia kia kite i ona tuakana, a, i ona matua hoki. Na tona tipuna whangai i whakaatu ki a ia ki wai ona tuakana. Na, i tetahi po, ka whakakite a ia ki ona tuakana, a, ka patai, “Ko wai o koutou matua, a, kei hea e noho ana?” Ka ki mai ratou kahore ratou e mohio. Ka mea atu a ia ki a ratou, “Maku e kimi”. Ka kata mai ona tuakana ki a ia. Auatu, i tetahi po, ka whai a Maui i ona tuakana ki te wharenui. He haka, he waiata hoki nga mahi i taua po. I reira ka kite a ia i a Taranga. Mohio tonu a ia ko tona whaea tenei, engari kahore te wahine nei i aro mai ki a ia. Ka huna a Maui i muri tata tonu i ona tuakana. No te tataunga o Taranga i ana tamariki, tokorima ke ratou, kahore i tokowha. Kat-
ahi ano a ia ka kite i a Maui. Ka patai a ia, “Ko wai koe” Ka tu a Maui, ka whakamarama ki a Taranga. Timataia e ia tana korero mai rano i te wa i whanau ai a ia, a, tae noa ki te kitenga a tona tipuna a Tama-nui-ki-te-rangi i a ia. Ka tuohu te matenga o Taraanga, notemea he tika nga korero a te tamaiti nei. Ka tangi a ia, ka mutu ka ki a ia, “He tika, ko koe toku whakamutunga. Ko te ingoa mou, ko Mauitikitiki-a-Taranga”. Hopukina mai e ia tona potiki kia moe i tona taha. Te ohonga ake o Maui i te awatea, kua ngaro ke tona whaea. Penei tonu ia ra, ia ra. Po iho ano ka tae mai a Taranga, a, ao ake te ra, ka haere. Ko Maui kei te whiriwhiri me pehea ra e kitea ai e ia te kainga o tona whaea i te awatea. Na, i tetahi po, ka takoto nohopuku a ia i te taha o tona whaea. Whanga rawa a ia kia moe katoa a Taranga ratou ko ona tuakana, a, ka matika a ia. Ka whakapurupurua e Maui nga matata o te whare, te matapihi te tatau, kia kore ai e uru mai te maramatanga, ina whiti te ra. Hunaia ano hoki e ia nga kakahu o Taranga. Haere, haere, a, whiti noa te ra. Ka oho ake a Taranga, ka titiro. Ha, e pouri tonu ana. Ka whakarongo a ia, ka rongo i nga tutu o te ao marama, i te tangi o te manu, me etahi atu. Ka whakatika a ia, ka kimi i ona kakahu. Kore rawa i kitea. Ka huakina e ia te tatau, ka oma. Ko Maui kei muri tonu e konihi haere ana. Ka tae a Taranga ki tetahi pu wiwi, ka tangohia e ia. Na, he rua i raro i taua pu. Te hekenga atu o Taranga ki roto i taua rua, ngaro tonu atu. Te hokinga mai o Maui ki ona tuakana ka ki atu a ia ki a ratou e haere ana a ia ki te rapu i te kainga o ona matua. Ka whakaahua a ia ia i a ia ki te ahua o te kereru, a, ka whakamiharo ona tuakana ki a ia. Ka rere a Maui, ka tae ki te pupu wiwi ra, ka tangohia e ia, a, ka heke a ia ki roto i te rua. Ka roa e rere ana a ia, ka kite i tetahi whenua hou, atahua hoki. I konei ka kite ia i te rangapu tangata, i raro i nga rakau manapau, e noho ana, a, e takoto ana hoki. Ko tona whaea tana i whai ai, a, kitea ana e ia. Na reira ka tau a ia ki runga i te rakau i runga ake i a Taranga. He tane tona hoa. Mohio tonu a Maui ko tona matua tane tenei. Katahi a Maui katango i tetahi o nga hua o te rakau nei, ka tukuna e ia kia taka ki runga i tona matua tane. Kahore te tangata ra i korikori. Engari no te takanga mai ano o tetahi hua, ka titiro ake a ia, ka kite i te manu. Ka timata ona hoa ki te haepa kohatu ki te manu ra. Kore rawa i pa. No te roanga, ka whakataka a Maui i a ia, ano nei kua mamae. Engari tau ana ia ki te whenua, tu mai ana, ehara i te manu, engari he tangata. Ka titiro a Taranga, engari kahore i tino mohio ko wai o ana tamariki tenei. Ka patapatai ia i a Maui, a, tae mai ana ki ona whakaaro, e, ko Mauitikitiki-a-Taranga tenei. Ka mutu nga whakamarama ki tona matua tane, ka haria a Maui ki te wai o tona papa, kia tohia, kia pai ai hoki tana noho i te whenua tapu nei. I muri mai i tenei, ka hoki ia ki ona tuakana a, whakaaturia ana e ia nga mea katoa. Ka koa nga ngakau o te katoa, notemea kua kitea e Maui o ratou matua, me to raua kainga noho hoki.
Permanent link to this item
https://paperspast.natlib.govt.nz/periodicals/TAH195407.2.14
Bibliographic details
Te Ao Hou, Winter 1954, Page 21
Word Count
1,075Ka kimi a Mani i ona matna Te Ao Hou, Winter 1954, Page 21
Using This Item
E here ana ngā mōhiotanga i tēnei whakaputanga i raro i te manatārua o te Karauna, i te manatārua o te Māori Purposes Fund Board hoki/rānei. Kua whakaae te Māori Purposes Fund Board i tōna whakaaetanga ki te National Library of New Zealand Te Puna Mātauranga o Aotearoa kia whakawhanake kia whakatupu hoki ā-ipurangi i tēnei ihirangi.
Ka taea e koe te rapu, te tirotiro, te tā, te tiki ā-ipurangi hoki i ngā kai o roto mō te rangahau, me ngā whakamātau whaiaro a te tangata. Me mātua kimi whakaaetanga mai i te poari mō ētahi atu whakamahinga.
He pai noa iho tō hanga hononga ki ngā kai o roto i tēnei pae tukutuku. Kāore e whakaaetia ngā hononga kia kī, kia whakaatu whakaaro rānei ehara ngā kai nei nā te National Library.
The Secretary Maori Purposes Fund Board
C/- Te Puni Kokiri
PO Box 3943
WELLINGTON
Waea: (04) 922 6000
Īmēra: MB-RPO-MPF@tpk.govt.nz
Information in this publication is subject to Crown copyright and/or the copyright of the Māori Purposes Fund Board. The Māori Purposes Fund Board has granted permission to the National Library of New Zealand Te Puna Mātauranga o Aotearoa to develop and maintain this content online.
You can search, browse, print and download for research and personal study. Permission must be obtained from the board for any other use.
You are welcome to create links to the content on this website. Any link may not be done in a way to say or imply that the material is other than that of the National Library.
The Secretary Maori Purposes Fund Board
C/- Te Puni Kokiri
PO Box 3943
WELLINGTON
Phone: (04) 922 6000
Email: MB-RPO-MPF@tpk.govt.nz