KIA HIWA RA! KIA HIWA RA!

Te Ao Hou, Summer 1954, Page 8

KIA HIWA RA! KIA HIWA RA! Te Pokaikura, te paenga whakairo e moe ra i te po, i te pokenekene, i te pouriuri i te potangotango, maranga, e oho, whitiki! Whakarongo ake ra e mata te irihia ki e hau no Tu he taua, whakatika, powhiritia te Upoko Ariki o te Tatai tenei ka tata mai! Te manuhiri tuarangi, te waewae tapu o te taha tu o te rangi, te kotuku rerenga tahi, naumai, haere mai! Mauria mai te ahuatanga o to matua, ona whakamataku, ona tapu, ona nui, to matau Kingi aroha ka wehe nei i a matau. Haere mai ko koe ra hoki ia, te manu koroki o te ata, hora i te hari me te koa ki te katoa. Aue! kua ngaro i tenei ra. Haere te Matua, e piki ki te toi-o-nga-rangi ki o tupuna. Takahia atu te huanui ki te marae o te oranga-tonutanga. Haere, haere, haere! NANA—kanapa ata te ihiihi o te ra hou. Te Ruahine, te tapairu takahi puni, Haere mai! Haere mai ki tenei maramara pamamao o tou Kuinitanga. Haere mai ki Aotearoa. Kuini o te torono whakahirahira o tupuna i waihangatia e te ngakau tapatahi o nga mano tini, piki mai, kake mai ki o marae! Te Toa Taura, uri rangatira o nga momo Kingi kua hono nei koe ki to matau Kuini, nau mai, haere mai! Kei te koa te ngakau. Haere mai i nga rangi kororia nui mo te wikitoria na te ringa kaha i whakau ki uta. Haere mai Tamara, koutou ko a matau tamariki na koutou te rakau i hapai kia noho rangatira tatau i tenei ao. Naumai haere mai ki a matau ki enei iwi o to matau Kuini! Haere mai e Te Kuini i roto i nga tuhono-honotanga o te ao kaore nei e rautaami i te whakaaro o te tangata, o nga kaupapa ture e rite ana mo te iti mo te rahi, o te ngakau whakahihira nei i nga whenua katoa i raro i to rangatiratanga, mo te whakaotitanga atu mo tatau katoa i rapua ma nga huarahi maha. Haere mai, paihereheretia matou kia piri, kia tupu ai nga mea rarahi kia rahi atu, kia tau ai te aiotanga ki te katoa. E te Puhi-ariki o te Kahuimua, e whakahihira ana matau mou i mau ki nga tikanga o tou Tatai me tou Whare. Notemea, e tika ana te hunga o runga o nga nohoanga pahikohiko kia rite te anga o a ratou kanoki ki te iti ki te rahi. Noreira, haere i waenganui i o iwi Maori kaua hei awangawanga, pono tonu te whakaaro i o ratou whatumanawa, te aroha i hoatu ra ki to tupuna, ki a Wikitoria, me ona uri i whai i a ia. E Te Murau a te tini, e Te Wenerau o te mano, E Te Whaea o to matou Piriniha mauria mai te whakapono o te wahine e tohe nei kia tau te ao rangimarie pumau e hipa atu nei i te hinengaro o te tangata. Nga mamaetanga o te ao kumekume, ma te ringa wahine e aumiri ka ngawari. Haere mai i roto i te wairua o Ingarangi e karanga nei ki nga tangata katoa kia haere i te huarahi o te rangimarie me te aio. Otira, haere mai koe te whakatinanatanga o nga tumanako e wawata ai nga iwi katoa mo te au e tau ai te ora, te koa me te rangatira tanga. Haere mai, a Haere atu! E hoki i runga i te pai me te ngakau tatu ki te pono o to matou aroha, mauria atu te whakahounga o ta matou oati ki to papa me to whaea i runga ano i te marae nei i to raua taenga mai ki waenga i a matou: he aota i whanau ake i roto i Te Tiriti o Waitangi, a na te wa me nga tini whakamatautauranga i whaka tapu. Ka pumau tonu te piripono o Te Iwi Maori mo ake tonu atu! Noreira, haere! haere! haere! MO TE IWI MAORI (Sgd.) E. B. CORBETT, Mema o te Whare Paremata: Minita mo nga Take Maori. (Sgd.) T. P. PAIKEA, Mema Paremata mo te Tai Tokerau. (Sgd.) T. OMANA, Mema Paremata mo te Tai Rawhiti. (Sgd.) E. T. TIRIKATENE, Mema Paremata mo te Waipounamu. (Sgd.) I. RATANA, Mema Paremata mo te Tai Hauauru. Rotorua, N.Z., Henuere 2, 1954.