Nga Titotito a te Maori

Te Ao Hou, Royal Tour 1953, Page 43

Nga Titotito a te Maori WAIATA A HINEWAHIRANGI Na R. T. Kohere i tuhituhi Tera ia nga pukitanga Tipare o Niu, e; Ko te ara tonu ia whanatu ai koe ra; Maku nei e riringi ki te wai roimata, na! Te kotonga nei mana hau e whiu, e, Noho ana hoki au te motu a Kaiawa, e, Te Kura a Tarawhata e kore nei e taea, na! Te ata kitea atu e au te pae ki te whenua, e, I te wai o te kamo ka utuhia ki waho, e, I te mata i ahau i te po roa nei, e, I te kore rawa ra kihai rawa i whairo, e, Nga rakau o te hore kia mowai ana, na! Nga Whakamarama He tino waiata tenei na Ngati-Porou, te tangi a Hinewahirangi, mo tana tamaiti, mo Te Wikiriwhi Matauru, Ko te tane, ko Tikitikiorangi, he rangatira no Ngati-Porou, na Ngapuhi i patu. Ka taka te wa, ka hiahia a Hinewahirangi ki te hoki ki tona ake kainga ki Tokomaru. Ka tau ona whakaaro, ka hiahia ia ki te tane, ka mamae nga tupuna o te Matauru, ka tikina ta ratou mokopuna, ka tangohia mai i te koka i a Hinewahirangi. Kei te huarahi tana tamaiti, ka tangihia atu e Hinewahirangi. E kore e taea e ia te aru tana huatahi ki Te Pakihi, East Cape, kahore hoki ia i te paingia e te iwi o tana tamaiti, heoi ano tona hiahia kia tata noa atu ia ki tana tamaiti, ka mariri tona pouri. Katahi ia ka karanga ki te kotonga hei whiu i a ia ki te motu, ki Whangaokeno i huaina nei e Kapene Kuki ko East Island, a i huaina hoki e Hinewahirangi, ko te ‘Motu a Kaiawa’. Ka nui tenei tona tae awairua ki te mout, titiro atu ai ki uta, kei reira nei tana tama, ahakoa he puke kei waenganui i a raua, kei runga o te puke he uru rakau, he hore. Kei raro atu ko tana tamaiti, Ka nui tenei. I haere mai a Kaiawa, tama a Taiau, i Turanga ki te rawhiti, kia kite i te kahawai