HE TANGI MO TA TANARA MAKARINI.

Waka Maori, Volume 13, Issue 7, 17 April 1877, Page 108

HE TANGI MO TA TANARA MAKARINI.

He waita tenei i raro iho nei mo te matenga o Te Makarini. I mahia e tetahi Pakeha kite reo Pakeha. Erangi i whakaritea kia rite kite rerenga whakaaro a te tangata Maori. E kore e taea e matou te whakatu i tana waiata kia rite kite waiata Maori Erangi me whakamarama atu e matou nga tikanga o roto. Te timatanga o taua waiata he whakahua i nga mea e whakahuatia ana e te Maori i roto i tana waiata ina tangi ia ki tona hoa aroha, ara he manu rerenga tahi, he whetu marama, he mere pounamu, he aha atu; otira ko tenei hoa aroha, ko Te Makarini, kua ngaro, kua mate ia, kua riro kite reinga, kua uru ia hei hoa mo nga Kaumatua rangatira i reira, a titiro iho ana ia ite rangi kite Maori e.noho pouri ana. E tono ana te waiata ki nga rangatira me nga hapu ote iwi o Maui kia hui mai kite wahi kotahi, kia ahei ai ratou te whakahonore ki to ratou hoa aroha kua ngaro atu nei, ka kakahu ai hoki i te kakahu taua mona. Kia hui katoa nga iwi kite wahi kotahi me tangi ratou kia rongo ai nga mea katoa i te aue, kia aroha mai ai ki nga tangata e tangi ana. E patai ana nga iwi mehemea ka kitea ranei tetahi tangata hei whakakapi mona i mohiotio nei e ratou i arohatia nuitia hoki; tetahi tangata manawanui kite whakarongo ki nga tikanga kuare a te Maori ina tahuri ia kite he. Tetahi tangata mohio kite whakahaere pai i nga tikanga pehi i nga mahi kino a etahi tangata, kei rere katoa te iwi Maori kite mate. Ka mea hoki te waiata i konei, ko te tangata e pouritia nei he matua ia no nga iwi Maori, he tuakana hoki, he hoa aroha no ratou, he kai whakahaere hoki i a ratou, te take, he maha no nga tau i mahi ai ia i nga tikanga uaua hei oranga mo te iwi Maori j a he aroha nona ki tona rangatira ki a Kuini, ki tona whenua, ki tona iwi Maori hoki i arohatia nuitia e ia, i puta ora ai ia i roto i nga he i te wa a tona oranga. E mea ana hoki te waiata, e pouri nui ana te iwi Maori e tangi nei ki a ia kua ngaro atu i a ratou, no te mea e ki ana ratou e kore e kitea e ratou tetahi tangata i roto i nga iwi katoa o Ingarangi hei tango ite mahi o taua hoa aroha nui. Ahakoa kua ngaro atu i a ratou taua tuakana i arohatia, i whakahonoretia nei, e ki ana te waiata e kore rawa e warewaretia e te iwi Maori nga mea i akona e ia ki a ratou erangi ka puritia hei taonga nui i roto i o ratou ngakau mo ake tonu atu. A, inaianei ka nehua e ratou ki roto kite poka tapu a Ta Tanara Makarini nga whakaaro mauahara ki o ratou tuakana Pakeha, kia rite ki a ia a takoto nei ki to ratou aroaro i mate nei i runga i te mahi whakakotahi i nga iwi e rua.

(Be mea Whaka-maori na Sare Reweti.) Koe wawara a te Maori Koe kaha a te iwi Koe tama i arohaina e Eoe manu o te wao Koe turama o te whare Whetu marama e Koe mere whakapurero ake ra. Kua riro ia koe, kua riro ia koe Kua whaia rate reinga Te huinga a te hira, a nehe ra. E 'tiroiuai nei i nga whetu kapokapo Ki enei nga uhunga. Kia mene mai ra nga iwi Nga rangatira hoki ra Koi toronga a Mani e. TJhia mai a hine ma, a whae ma Uhia mai a tama ma, a Kara ma, Ki kahu taua e. Mo taua nui, mo taua a Maui ra Mo tama ra uri na Maui Kua tae kite aupuhipuhi ki a Maui papa.

Hapainga e te iwi nga reo e Whakahoki karangaranga E te puke e te mania E te moana, e te tapatai e Hai whakarongo ma te manu ma te ika Ina tangihia te tangi i titotitoa nei Mo te tau, mo te toa kua ngaro ra e. Kowai atu ra he maitai e Maria e pepehi a taua raweke A taua anga ke, wairua kore, he manawa I te kakarauritanga ra ? Me kite, me aha tetahi atu hei ata kawe marire I runga i te pono i te rigaaahau I te ngeungeu kore. I rere tawheta te Maori Kite whai ite rangiateatanga ture kore I kiia ra kia mawehea nga tika i herea ra. Karapotia iho eia kite aroha Kaore i aetia te motuhanga mai, a ora ana taua. Ko te papa, ko te muanga, ko te hoa, ko te kai-ako Ko tana tu kite Maori koa I nga mate, i nga riri, i nga ngutu wene Kaore koa i anga ke i te ara o te ture I nga ture nui atu Heke koa kite muri Tana i pupuri ai ko te ture Kuini ra tae noa atu ki whenua Waiho nei te aroha ki tenei motu Hei manawa mana e. Rehungatia ra nga nehu tapu I te konohinohi o te ngakau e Kowai o tarawahi koa hei whakakapi I tana turanga i tu ai. E pa, e te muanga, e te hoa, e te kai-ako Ka ngaro koe i te ngaro korekore Ngaro atu koe, tenei au ki Nga ki o to nohoanga i te aoturoa Waiho range ma te ngakau e hopu Ma te ngakau o au tamariki ra I nga tau e tataka haere ana I nga turanga pouri ina whaia Te huka o te pakanga e. Nau koa enei hanga tae noa kite hemonga. Nehua atu ra i te urupa tapu Nga mauahara, nga ririhau Nga riri mo Maitai. ra. TThonoa iho enei e rua i tou mereretanga Herea iho kia kotahi.