News In Fijian

Mana (Auckland), Volume 2, Issue 3, 4 May 1978, Page 7

News In Fijian

E na vula ko Epereli sa dromu e rauta e ra lewe 300 na vulagi duikaikai ka ra a tiko e na soqoni ni veikidavaki vua na Mata 1 -kiNiu Siladi ni Matanitu ko Viti, ko Ratu Josue Tonganivalu kei na nodra marama ko Mrs Alice Tonganivalu. E vakayacori e na Vale ni Veivakamarautaki vakaitamera, na Trillos, mai na loma ni koro levu ko Okaladi na soqo lagilagi ni veikidavaki oqo. A cakava na veiqararvi vakaturaga vakavanua vua na gone turaga ko Ratu Josua, e dua vei iratou na turaga Masau mai Bau, ko iratou na cauravou tiko vakavuli mai na Koronivuli Levu ni Vulitorocake na Auckland University.

A vakacabora na i sevusevu ka qai tubera na kamunaga na i vakaraitaki ni nodra yalo ni veikidavaki kei na veinanumi e na vukudra na lewe ni i soqosoqo na Fiji-New Zealand Society na manidia ni Valenivolavola ni Saravanua kei Viti e Niu Siladi, ko Mr Viliame Raikuna. A tauca na vosa ni veikidavaki e vukudra talega na lewe ni i soqosoqo na Fiji-New Zealand Society kei na vukudra na Noda ka ra vakaitikotiko e Okaladi ko Mr Tony Moore, ka a lewe ni Bose Lawa tu mai Viti e liu. E vakaoqo na nona vosa ni veikidavaki ko Mr Moore — “Ni sa tuna turaga na Mata kei Viti e Niu Siladi kei na nomuni marama. Sa ka ni marau vei au me’u vosa yani vakalekaleka e na vukumuni, na turaga kei na marama, ka me’u vakabula vei Ratu Josua kei na nona marama. Ni matavinaka mai ki Niu Siladi! E da sa kila vinaka na vuvale nei Ratu Josua, na vuvale na Masau, na liga i matau ni Vunivalu kei Bau. Keimami marautaka, Ratu Josua, na nomuni lesi mai ki na i tutu cecere vakamata, ai tutu

veirauti vinaka kei na nomuni vuvale. Au vakabauta ni e da na duavata e na noda gagadre me vauci vakakaukauwacake na nodrau veitokani ko Viti kei Niu Siladi, ka’u kila talega ni na veirauti vinaka na noda gagadre oqo kei na i lesilesi vou nei Ratu Josua. Ni matavinaka mai! Me nomuni ruarua na bula vinaka ka me torocake tikoga na nomuni cakacaka”.

E na nodra vosa ni vakavinavinaka ko Ratu Josua, a vakayatuyatptaka kinae na vosa vakaciriloloma ka veivakaduavatataki Viti kei Niu Siladi ka vakatautauvatataka na vanua e rua oqori me vaka e dua naveiwatini. “Enasonagaunae rau dauveiletitaka e vuqa na ka me baleta na nodrau vuvale se me e rau dau sega ni lomavata e na nodrau duiveiyalayalati, ia, e rau sega ga ni yacova sara na i yalayala ni veitawesei, me e rau sa laki veibiu se veisere sara vakalawa e na Valenivolavola ni Vakamau vakamatanitu. A vakayatuyatutaka talega ko Ratu Josua na balavu ni gauna talei ka mamarau e rau bukia vata tiko na wa ni veiwekani ka vauci e rau vata kina na vanua ko Viti kei Niu Siladi. A tinia na nodra vosa ni vakavinavinakz na gone turaga Masau ko Ratu Josua e na nodra vakacaucautaka na veiqaravi vakaturaga vakavanua e ra a vakayacora vua kei na nodra marama na lewe ni i soqosoqo na Fiji-New Zealand Society kei na nodra yalo dei na duikaikai ki na vanua ko Viti. Ni sa oti taucoko na cakacaka ni veiqaravi vakavanua era a qai ucu yadudua yani na vulagi duikaikai me ra sa laki lululu ka veitalanoa vakalekaleka kei Ratu Josua kei na nodra marama, ka tekivu sara na gunu (cocktail) ka lako vata tiko kei na kena i coi.

A osodrigi na nodra Rumu Levu ni Wawa na Dausaravanua (Overseas Lounge) mai na wavu na Princes Wharf e Okaladi e na Vakarauwai na i ka 29 ni vula sa oti, ni ra sa tadu yani na duikaikai ni veiyanuyanu e na Pasifika mai na veiyasana e na Yanuyanu na Tokelau ki na nodra soqo ni vakaduri i lavo (South Seas Fiesta) na Niusiveva na Mana. E ra lewe levu na Noda e ra a tiko e na soqo oqo. Na kabani ni Waqavuka na Air Pacific, na Valenivolavola ni Saravanua kei Viti e Niu Siladi kei na kabani ni Waqavuka na Polynesian Airlines eratou a veivuke kina e na kena vakarautaki se na kena tokonitaki, ka mani vakayacori rawa kina na soqo ni vakaduri i lavo oqo. Na manidia ni Air Pacific e Niu Siladi, ko Mr Roy Thomas kei na nona marama ko Mrs Thomas kei Mr Brian Wendt kei na nona marama ko Mrs Wendt eratou a tiko talega e na soqo oqo. Vinake vakalevu na veivukei Mr Thomas kei Mr Raikuna! Vakatalega kina vei keumuni _ na Noda ko ni dautokona tiko se dauwili Mana ko ni a tiko e na soqo ko ya. Vinaka vakalevu!