Monuina e Tau Foou

Mana (Auckland), Volume 1, Issue 13, 26 January 1978, Page 6

Monuina e Tau Foou

Fakaalofa lahi atu mo e tau fakaaue ki mua he Atua ha ko e Haana fakaalofa mai ki luga ha tautolu oti ati kua maeke ke hohoko mai a tautolu ke he Tau Foou nei. Fakaalofa lahi atu ki a mutolu oti mo e tau loto amaamanaki ke monuina mo e mafola fiafia e tau fenoga ha tautolu he tau nei tuga e tau ia kua mole atu. Mooli ni kua galo kehe falu he ha tautolu a tau matua. tau fanau, tau matakainaga. mo e tau kapisiga ha ko e mahani he moui nei ka e nava mo e fakaaue a tautolu ke he Atua mo e Haana Tama Fuataha ke lata mo e tau tino malolo mo e fiafia kua moua e tautolu he tau kua mole ke hoko mai ke he mogonei.

Fakaaue mo e fiafia foki ha kua maeke e tokologa ha tautolu ke feleveia mo e tau matakainaga, tau matua, tau fanau, mo e tau kapisiga mai he motu fakahele ha tautolu ko Niue Fekai. To lahi e fiafia he logona atu mo e mamata atu ke he lilifu mo e mafola he fenoga lahi ia mai he motu mooli ha tautolu. Kua amaamanaki ni e tau loto ke tumau pihia e fakaalofa noa mai he ha tautolu a Matua i luga ke liu maeke foki a tautolu ke liu fekiteaki mo e feleveia pihia ke he tau aho okioki pehe na i mua ke he motu nei po ko Niue. Tuga ni he tomatoma atu he tau magaaho kua mole atu ko e tau fenoga o fano feleveia kitekite pehe na ko e taha puhala homo atu a ia ke maeke ia tautolu ke fakatumau e tau loto feofanaki mo e kaufakalataha he tau magafaoa ha tautolu ne nonofo he motu nei mo e ha tautolu a motu fakahele ko Niue Fekai. Loga e tau mena lalahi mo e lilifu ne tutupu he tau kua mole ke he motu nei ti pihia foki mo e motu ko Niue. Ko e kamataaga he tau ne hoko mai e fenoga he Patuiki ha Pelitania ahiahi mai ke he motu nei mo e falu a motu foki he Atu Pasifika. Ha ko e fenoga haana kua maeke ke moua he falu matua ha tautolu e tau lilifu ke fakamailoga aki e tau gahua mitaki ha lautolu ma e tau tagata ti tutaki mai fakahaga e tau lilifu na kua foaki mai foki e tau fakamailoga ma e falu he tau matua ha tautolu ke fakamanatu aki e aho fanau haana. Ko e haana fenoga mai ke he motu nei kua moua ai foki he tau ma ua mo e tau matakainaga

ha tautolu e tau uiina kehekehe ke fakalataha atu mo e feleveia mo e Patuiki mo e haana ahiahi atu ke he tau fakafeleveiaaga

kehekehe he motu nei. Ko e tau kua mole foki ne fakatu ai taha matakau foou ke eke mo fakatonu mo e lagomatai atu ke he tau matakau kehekehe he tau Niue pihia foki mo e tau tagata ha tautolu kua nonofo ai he Maaga ko Aukalana. Ko e matapatu kupu he matakau foou nei ko e Niue Advisory Council for Auckland ne fakafita ki ai he tau kua mole ko e pulega mo e fakamaopoopo he tau kupu kua lata ke fakaveaki e tau gahua he Fono. Ko e tau nei kua amaamanaki ke fakagahua e tau mata kupu na kua fifili mo e talia ki ai e tau hukui he Fono he tau kua mole. Ko e taha kakano lahi he Fono nei ke eke ai mo matutakiaga he tau matakau kehekehe ha tautolu e tau Niue i Aukalana nei ko e tau kau mai he tau Lotujcehekehe, tau kau taute mena fakafiafia tino, tau kau fakatu ke lagomatai ke he tau tagata kua matematekelea, tau matakau faka-Maaga, tau matakau lagomatai fakatufono, mo e falu foki. Ko e matutakiaga na ke moua mai ai e tau loto feofanaki mo e kau-fakalataha ke he tau gahua ke monuina mo e mafola a tautolu oti kua nonofo i Aukalana nei pihia foki mo e ha tautolu a tau matakainaga kua nonofo ai ke he tau maaga kehekehe i Niu Silani mo Niue. Hahai ai e falu he tau matakau ha tautolu ne nakai la fai hukui ia ki loto he Fono ti kua amaamanaki ni ke fai hukui a lautolu he tau nei. Kaeke ke nakai la fai hukui ia e matakau ha mutolu ki loto he Fono ti mafiti a ke fakailoa atu ke he Tohi Kupu telefoni numela 760-132 poke 864-188 poke tohi atu ki a ia ke he kaina 12 Kingsland Avenue, Kingsland, Auckland. Ko e fono fakamua ma e tau nei kua amaamanaki ke hoko ai he Aho Faiumu 11 Febuari ke he Fale Aoga he Tau Aelani i 272 Jervois Road, Herne Bay, Auckland, he hola 2 mogo pale la afiafi. Ko e tau kua mole foki ne fakatu mo e fakatoka katoatoa ai e tau gahua he taha ofisa poke faahi gahua foou ne taute he Fakatufono Niu Silani ke lagomatai aki e tau tagata Aelani mai he Atu Pasifika he motu nei ko Niu

Silani. Ko e faahi gahua foou nei kua fakahigoa ai ko e Pacific Islanders' Educational Resource Centre kua fakatu mo e kamata fakamua ai i Aukalana. Kua igatia e tau motu nei mo e ofisa fakaako ke lagomatai atu ke he tau tagata motu ha lautolu ko Samoa Lalo, Kuki Aelani, Niue, Tokelau, mo Tonga. Ko e tau matapatu gahua he faahi gahua nei ko e kumikumi he tau puhala fakaako ke lagomatai aki e tau tabata Aelani mo e tau ■fanau aoga ha tautolu ke maeke ke moua e lautolu e tau kotofaaga kua lata tonu mo e tau fakaakoaga mo e tau lotomatala ha lautolu; mo e lali foki ke kau fakalataha e tau tagata Aelani mo e tau tagata Niu Silani ke femaamaaki e tau aga mo e tau mahani kehekehe ha lautolu ke moua mai ai e nonofo auloa mo e fiafia mo e felagomataiaki. Ko e tau vahega fakaako vaghau Pelitania ke lata mo lautolu e tau Aelani kua fia iloa e vagahau ia mo e tau vahega fakaako vagahau he tau Aelani kehekehe kua taute foki he faahi gahua na ke lata mo lautolu kua fia iloa e tau vagahau mai he tau Atu Motu he Pasifika. Loga foki e tau gahua kehekehe ' kua lagomatai ki ai e faahi gahua nei. Kua fakamooli foki he Fakatufono Niu Silani he tau kua mole e $65,000.00 ke fakatuaki foki taha faahi gahua foou ke lagomatai atu ke he faahi gahua kua fita e fakatu. Ko e faahi gahua he tau nei e faahi gahua foou na ke he fale ia he tapa fale he faahi gahua kua fita e gahua. Kaeke kua fia manako a mutolu ke iloa foki falu a fakailoaaga ke he tau faahi gahua na ne ua ti telefoni atu ke he Pacific Islanders’ Educational Resource Centre, numela 760-132 poke hoko tino atu ki ai i 272 JervoiSk Road, Herne Bay, Auckland. Ko e taha nusipepa poke tohi tala foou ne fakatu ai he lotoga tau kua mole ke lagomatai atu ke he tau tagata Aelani ne fia iloa e tau mena tutupu ke he motu nei mo e lalolagi ka e nakai maeke ia lautolu ha kua nakai maama e vaghau Pelitania. Ko e higoa he Tohi Tala poke Nusipepa foou nei ko e MANA haia. Kua tohia e nusipepa nei ke he fitu (7) e vagahau motu kehekehe ko e vagahau Pelitania, Samoa, Tonga, Niue, Kuki Aelani, Maori, mo Fisi falu magaaho. Kua ole atu ki a mutolu ke lagomatai e Nusipepa nei ha ko e taha puhala haia ke lagomatai aki e tau uluhina ha tautolu ne nakai maama e vagahau Pelitania ke maeke ia lautolu ke iloa ka totou he Nusipepa nei e tau mena tutupu he motu nei mo Niue foki.

Ko e tau kua mole foki ne fakatu ai taha faahi gahua leo taogo pauaki ma e tau Maori mo e tau Aelani ti taha ha tautolu a fuata kua moua e kotofaaga gahua mau ke he faahi gahua na ko e Pacific Islands Programme United he Radio New Zealand. Ko e vaha loto he hola 7 mo e hafa he mole hola 7 mogo afiafi ka logona poke fakapuloa atu ai e tau tala ke he vagahau Niue he Po Gofua, Po Lotu, Po Tuloto mo e Po Faraile he tau faahi tapu oti, Ko e matahigoa he Letio ka moua mai ai ko e IYA. Kua ole atu

foki ki a mutolu ke lagomatai mai e faahi gahua nei ha tautolu ke fakailoa atu ki a ia kua gahua ai e tau tala kua manatu a mutolu to fiafia e tau tagata ha tautolu ke logona hagaao ke he tau fiafia mo e tau fakafeleveiaaga kehekehe ha tautolu. Ko e numela telefoni haana ko e 78850 Ext. 705.

Ha ha i ai loga foki e tau mena kehekehe ne tutupu ai kua putoia ai a tautolu he tau kua mole ka e ai maeke ia au ke tokutoku atu fakamatafeiga ha kua loa lahi tei e tala ka e ai ko e pehe ko e fakateaga.

Ki a monuina mo e mafola fiafia e Tau Foou mo e tau gahua kehekehe kua hagaao atu a tautolu ki ai he tau nei. Ko e kaufakalataha mo e fefakafeofanaki ko e mena kua homo ue atu ma tautolu oti.