Ngamotu, Taranaki 14 Tiheme 1844 E to matou Kawana aroha, Tena ra ko koe. Ka nui to matou aroha ki a koe. I waru i nga ra o Nowema, ka tae mai koe ki Taranaki, te mea i haere mai ai koe no to matou raruraru ko nga Pakeha, ko nga Maori ano hoki. Muri iho ka tatau nga tangata o Ngamotu ki te ritenga mo te whenua, whakaritea ana ano hoki e matou nga rohe, nga paenga, a, i rite rawa. Muri iho ka whakaritea e koe nga utu ki te ritenga o aua pauna e toru rau. Heoi ka mea matou nga tangata Maori, e kore matou e pai ki nga moni, engari me tupara, me kau, me paraikete, haunga i te tini o nga mea katoa, a, ka whakaae mai ki a matou mea i whakaritea ai. A, i te 25 o nga ra o Nowema, ka haere atu koe. A, i te 27 o nga ra ka korero nga tangata o te whakaminenga ki nga whenua, a, mutu te tini o nga tangata, heoi, ka tu mai taua tangata, ko Te Ropiha Moturoa tona ingoa, i haere mai i Poneke. Ka mau ki te taiaha, ka korero, ka takahi nga waewae, ka tapeke ki[?] nga waewae, ka mea, 'E kore te whenua e marere atu i ahau ki a koutou, no te mea he utu toto nona. Ahakoa tokomaha noa koutou, nunui noa, ko ahau iti nei, rangatira noa koutou, penei ake o koutou turi, tuturi ana i au.' Ka mau a Poharama ki te taiaha a Hoani Ropiha, me te tini o nga tangata whawhai ana mo taua kupu a Te Ropiha Moturoa, he kupu kino hoki taua kupu ki a matou. Heoi mutu ake te whawhai a te 28 o nga ra o Nowema, ka tangohia e matou nga utu, ara, tetahi wahi utu ki Puketapu. Heoi pouri ana ratou i roto i