PAPERSPAST

Kō ngā kōrero tawhito o te Wellington Independent e kī ana i ngā kōrero mai i ētahi atu o ngā nūpepa tōmua o te tāone matua pērā i te New Zealand Spectator me te Cook's Straits Guardian (1844-1865) tae atu ana te New Zealand Gazette me te Britannia Spectator (1839-1844).

I tīmata te New Zealand Spectator i Pōneke i te tau 1844 i muri tonu i te ngaromanga o te Gazette (te nūpepa tuatahi o Aotearoa). I te tau 1845 ka whakamutua e ngā rangatira o te Spectator ngā kaitā o te nūpepa mō tā rātou whakaputa i tētahi pānui taki. Mai i tērā kātahi ka huri aua kaitā ki te hanga i tētahi atu nūpepa kē, ko te Wellington Independent.

I tāngia tuatahitia te Wellington Independent i te 2 o Paenga-whāwhā 1845, ēngari i mutu noa i ngā marama e whā i muri mai i te hokonga o ngā taputapu o taua nūpepa ki te Spectator hei utu i ngā nama a ōna rangatira. Ko te kaipupuri o aua taputapu a Samuel Revans, i tū hei ētita mō te Gazette i mua atu, ā, nāna hoki te mahi ki te whakaputa i te pānui taki ki te Spectator i whakamutua ai ngā kaitā. I Whiringa-ā-rangi o taua tau ka whiwhi te Independent i tētahi atu mīhini perehi, ā, kīhai i roa ka tū kē mai hei nūpepa i paingia e te nuinga. I tū kē mai mō ngā tau e iwa i muri mai i te mutunga o te Spectator.

I piki ake ai te painga o te Independent nā tōna tautoko kia whakatūria he kāwanatanga tā te nuinga e whakatau ai me tohu kia rerekē atu ai ki tā te Spectator me tana tautoko i te kawe a Kāwana Hōri Kerei kia ū tonu ki te kāwanatanga koroni.

Ki tā GH Scholefield (Newspapers in New Zealand, 1958) ko te Independent tētahi o ngā tino nūpepa o Aotearoa. Ka nui anō te whai mana meina ka tirohia ake ngā kaituku kōrero pērā i James Edward Wakefield, Te Pōkiha (William Fox), Edward Stafford me Dillon Bell.

Kīhai i whakawhānui ake te nūpepa nei i te tekau tau mai i 1860 me te tekau tau mai i 1870, ēngari e haere tonu ana i te wā i riro ai ia te New Zealand Times i te tau 1874.

I hokona atu ki te kamupene a Julius Vogel, ko te New Zealand Times Company, i te tau 1873. Ko te whakaaro a Vogel kia hangāia he nūpepa ā-motu hei kawe i ōna ake wawata tōrangapū. I te tau 1874 ka hurihia e ia te Independent ki tana nūpepa hōu, ko te New Zealand Times, i kawea tonu hoki ngā rārangi tatau mai i te Independent. Kīhai te Times i tū hei nūpepa ā-motu ēngari i tū tae noa ki te tau 1927, arā, te tau i riro ai ki raro i te maru o te Dominion.