PAPERSPAST

Nā te rerenga ki te kōura i te Tai Poutini i te tau 1865 i ora ai te West Coast Times. I mua o te rerenga kōura he ruarua noa iho ngā tāngata whai Pākehā i te Tai Poutini, he iti rawa hei ukauka i tētahi nūpepa.

Ko te West Coast Times te tuatahi o ngā nūpepa maha ki te tīmata i te takiwā o Hokitika i muri o te tīmatanga o te rerenga ki te kōura. I tīmata te West Coast Times i te marama o Haratua 1865, e rua marama noa i muri o te pānuitanga o te pārae kōura i te Tai Poutini i a te Kāwanatanga Porowini i ngā Pākihi-whakatekateka-a-Waitaha. I whakaūhia te nūpepa e John Tyrell, otirā taro tonu te hokonga ki a William Shaw, he kaitōrangapū o te rohe. Ko Shaw te Mea o Hokitika i te tau 1867.

Ko te angitu o te West Coast Times i takea mai i te tōnuitanga o te mahi kimi kōura, ka kitea i āna mahi pānui. I te tau 1865 ka puta tētahi tānga ā-wiki i huaina te Leader mō te hunga taiwhenua. Ka tīmata te tānga ia rā o te Times i te marama o Kohi-tātea 1866, ā, nō muri mai i taua tau anō ka perēhitia e rātou tētahi nūpepa ā-ahiahi ia rā, arā, te Despatch.

Nā te tōnuitanga i Hokitika me te mautohenga ki ngā mahi tōrangapū a Shaw i whakahau i ētahi atu kia whakaūhia he nūpepa i te tāone. Ko te Evening Star te tino tāwhai o te Times, nā Joseph Klein rāua ko James Snyder Browne i whakaū i te tau 1867, he mautohe ki a Shaw te tino take. I tae rawa te whakataetae i waenganui i ngā nūpepa ki tōna tihi i te tau 1868, i te whakaratonga o Klein rāua ko Browne i te pūtea tautoko, i te whakahaerenga hoki mō tētahi nūpepa ā-ata, arā, te Westland Observer. Ko te whakautu a Shaw ko te whakaoratanga i te Despatch, tana nūpepa ā-ahiahi i whakamutua i te tau i mua.

Heoi i whakatau tonu tēnei āhuatanga i te whakaritenga o Shaw ki te wehe atu i Hokitika. Ka hokona i a ia te Times e Klein rāua ko Browne, ā, whakamutua wawetia ana e rāua te tānga o te Despatch me te Observer. Mai i tērā wā tae noa ki tōna mutunga i 1917 he āhua hira kore te hītori o te Times. He maha tonu ngā whakawhitinga rangatiratanga. I te tau 1874 ka taumanu a Robert Caldwell Reid. He kaitōrangapū whakarae a Reid, he mātātoa ki ngā kāwanatanga ā-rohe, ā-motu hoki. I hokona te nūpepa ki a Leonard Northcroft rāua ko Harry Snow i te tekau tau mai i 1880, ā, i te tau 1917 ka hokona ki te kamupene o Dawes, Nightingale & Co. Nō muri mai i taua tau anō ka hanumi ki te Hokitika Guardian and Star.

I mutu te tānga o te Hokitika Guardian i te tau 1988.