PAPERSPAST

I whakaputaina te Tuapeka Times i te tāone o Lawrence, i Otākou o Waenganui mai i te tau 1868 ki te tau 1941. Nā Andrew Ferguson, rātou ko Andrew Burns, ko John Ludford te Times i tīmata.

I te tau 1869 i taumanutia e rātou tō rātou tāwhainga, te Tuapeka Press (1866-69). I te tau 1881 nā Thomas rāua ko Richard Pilling te Times i hoko. Ka whakaputaina e rāua tae noa ki te tau 1896, i hokona atu ai ki te Kamupene o te Tuapeka Times, nā John Norrie i whakahaere. Ka noho ko Norrie te rangatira o te nūpepa tae noa ki tōna matenga i te tau 1938.

I mate puku atu te Tuapeka Times i a Whiringa-ā-rangi o te tau 1941. Ko tētahi kupu whakapuaki i roto i te tānga whakamutunga, e aki ana i te iwi whānui kia tautokona whānuitia ngā nūpepa kāinga o te motu, koia anake te tohu iti e mutu ai ana mahi tā. I hemo tonu pea te nūpepa i ngā kōpaka pepa, kōpaka kaimahi hoki i puta i te Pakanga o te Ao, i te matenga anō hoki, e toru tau ki mua, o tōna kaiwhakahaere tūroa, o John Norrie. I tēnei āhuatanga kāore te Times i tū ko tōna kotahi: he maha noa atu ngā nūpepa taiwhenua o Niu Tireni i kati ai i ō rātou kūwaha i taua wā i te kōpaka rauemi. Kei te tika tonu pea i maha ngā tau i whawhai te nūpepa ki te noho puare tonu. Mai i te tau 1873 e rua noa āna tānga ia wiki, ā, te nuinga o te wā kāore i hipa ake ia tānga i te whā whārangi.

He rerekē te āhua o te matenga o te Times ina whakaritea ki ōna tau tīmata i noho ai te nūpepa ki waenganui tonu i te wā e tino reia ana te koura e ngā kairapu koura i Otākou o Waenganui. I pātata hoki a Gabriel’s Gully ki te wāhi i kitea ai tō Niu Tireni kitenga tino hiranga tonu o te koura. He whakaputanga te Times nō taua wā rapu koura, nā reira ka noho āna tānga o tērā wā hei rauemi tino waiwai tonu o te ako i te hītori o Niu Tireni i waenganui o te rautau tekau mā iwa, te wā i mea ai e te koura ko Otākou te porowini o mua tonu o te taiwhenua.